Qazaqstandyq dzıýdoshylar Brazılııadaǵy sýrdlımpıadada taǵy 3 medal jeńip aldy
NUR-SULTAN. QazAqparat – Brazılııanyń Kashıas-dý-Sýl qalasynda ótip jatqan 24-shi jazǵy sýrdlımpıadalyq oıyndarda qazaqstandyq dzıýdoshylar taǵy úsh medal jeńip aldy, dep habarlaıdy QazAqparat tilshisi.
Qazaqstan dzıýdo federatsııasy málim etkenindeı, Ádilbek Nurmuhamed 60 kelige deıingi salmaqta fınalda ǵana qarsylasyna ese jiberip, kúmis júldege ıe boldy.
Sonymen qatar Shaıahmet Qanapııanov 73 kelige deıingi salmaqta qola medal ıegeri atandy.
Oǵan qosa Ferıde KaraOgly 48 kelige deıingi salmaqta úzdik úshtikke ilikti.
Osylaısha, qazaqstandyq sýrdodzıýdoshylar medal sanyn 4-ke jetkizdi.
Munda sýrdodzıýdodan Qazaqstan quramasynyń aǵa jattyqtyrýshysy Haırolla Lýkmanovtyń sińirgen eńbegi mol.
Eske sala keteıik, budan buryn qazaqstandyq sportshynyń Brazılııadaǵy sýrdlımpıadalyq oıyndarda qola júldeger atanǵanyn jazǵan bolatynbyz.
Batys Qazaqstan oblysynyń ókili Dına Erjanova sýrdodzıýdodan 52 kelige deıingi salmaqta júldegerler qatarynan kóringen edi.
