Qazaqstandyq dzıýdoshylar Azııa kýbogyn tórt altyn medalmen qorytyndylady
NUR-SULTAN. QazAqparat – Aqtaý qalasynda dzıýdodan Turar Joldybaevty eske alýǵa arnalǵan ashyq Azııa kýbogy márege jetti, dep habarlaıdy QazAqparat tilshisi.
Qazaqstan dzıýdo federatsııasy málim etkenindeı, Qazaqstan quramasy jarys qorytyndysynda 4 altyn, 2 kúmis, 10 qola medaldi jeńip aldy.
Jalpykomandalyq esepte 7 altyn, 8 kúmis jáne 10 qola júldemen Reseı quramasy kósh bastasa, qazaqstandyqtar ekinshi orynda. Ońtústik Koreıa 2 altyn, 3 qolamen úshinshi orynǵa ilikti.
Týrnırge Ázerbaıjan, Gonkong, Iran, Qazaqstan, Ońtústik Koreıa, Qyrǵyzstan, Mońǵolııa, Reseı, Ispanııa, Tájikstan jáne Ózbekstan, barlyǵy 11 elden 175 tatamı sheberi qatysyp, baq synady.
Jarystyń ekinshi kúni Qazaqstan quramasynan Vıktor Demıanenko (100 kg) chempıon atandy. Sondaı-aq Zarına Raıfova (78 kg) men Aıbol Nysanalı (81 kg) kúmis júldeni enshiledi. Al Zere Bektasqyzy (70 kg), Nazgúl Maratova (+78), Suńǵat Zakarııaev (90 kg), Nurlyhan Sharhan (100 kg) jáne Nurdáýlet Jarylǵapov (+100 kg) úshinshi orynǵa kóterildi.
Eske sala keteıik, budan buryn Qazaqstan quramasy jarystyń alǵashqy kúni úsh altyn alǵanyn jazǵan bolatyn.
Týrnır jeńimpazdaryna 100, kúmis júldegerge 60, qola medal ıegerine 40 upaı beriledi.
