Qazaqstandyq dzıýdoshy jastar arasynda álem chempıonatynyń qola júldegeri atandy
NUR-SULTAN. QazAqparat – Qazaqstandyq Sherzod Davlatov Italııanyń Olbııa qalasynda dzıýdodan jastar arasynda ótip jatqan álem chempıonatynda qola júldeger atandy, dep habarlaıdy QazAqparat tilshisi.
Qazaqstan dzıýdo federatsııasy málim etkenindeı, almatylyq Sh.Davlatov 60 kelige deıingi salmaqta qola júlde úshin básekede ózbekstandyq Kamolıddın Bahtıerovpen tatamıge shyqty.
Sherzod qarsylasyn ıpponmen taza jeńdi.
Sh.Davlatov shırek fınaldyq beldesýde grýzııalyq Georgıı Sardalashvılıge jol bergen edi. Degenmen sosyn jubanysh básekesinde reseılik Abý-Mýslım Parchıevten aılasyn asyrdy.
Jastar arasynda álem birinshiligi 10 qazanǵa deıin sozylady.
