Qazaqstandyq dzıýdoshy London olımpıadasyna qatysýǵa múmkindik beretin alǵashqy 200 upaıǵa ıe boldy
ALMATY. 22 aqpan. QazAqparat /Erlik Erjanuly/ - 19-20 aqpan kúnderi Germanııanyń Dıýsseldorf qalasynda dzıýdodan Gran-prı serııasyndaǵy Álem kýbogynyń birinshi týrnıri ótti.
Onda el namysyn erler arsynda qorǵaǵan 22 sportshynyń bireýi ǵana júldeli boldy. 100 keli salmaqta beldesken 2009 jylǵy Álem chempıony Maksım Rakov aqtyq synda jarys qojaıyny Dımıtr Petersti tize búktirip, altyn medaldy oljalady. Bul dúbirli dodaǵa 68 elden erler arasynda 305, al áıelder arasynda 195 balýan qatysty. Olardyń arasynda 8 Olımpıada chempıony, 18 Álem chempıony jáne 2010 jyly Venada ótken Eýropa chempıonatynyń 10 jeńimpazy boldy. Júlde qory 100 myń AQSh dollaryn quraıtyn bul jarysta jeńimpazdar 3 myń dollar aqshaǵa ıe bolyp, óz reıtıngin 200 ballǵa ulǵaıtty.
Dzıýdo sportynyń halyqaralyq kúntizbesinde bıyl 2012 jylǵy London olımpıadasynyń dárejelik upaılary sarapqa salynatyn 5 týrnır enip otyr. Álem kýbogynyń kelesi kezeńderi endi 6-8 mamyrda Bakýde, 16-18 qazanda Ábý-Dabıde, 25-27 qarashada Rotterdamda, 17-18 jeltoqsanda Kvındaoda ótpek.
