Qazaqstandyq dzıýdoshy Eýropa kýbogynyń jeńimpazy atandy
NUR-SULTAN. QazAqparat – Bratıslavada dzıýdodan ótip jatqan Eýropa kýbogy jarysynda qazaqstandyq Baqytjan Abdýrahmanov jeńimpaz atandy, dep habarlaıdy QazAqparat tilshisi.
Qazaqstan dzıýdo federatsııasy málim etkenindeı, Baqytjan 73 kelige deıingi salmaqta jeńis tuǵyryna kóterildi.
Týrnır barysynda ol fınalǵa deıin bes kezdesý ótkizip, barlyǵynda mereıi ústem boldy. Al sońǵy básekede slovenııalyq Djýz Mekılosekti qosymsha ýaqytta ıpponmen tize búktirdi.
Slovakııa astanasynda bolyp jatqan eresekter arasyndaǵy aıtýly dodaǵa álemniń 34 elinen 384 dzıýdoshy qatysýda.
Olympic.kz saıtynyń habarlaýynsha, Tokıoda ótken álem chempıonatynan Qazaqstan quramasy oqý-jattyǵý jıynyn Shymkentte ótkizedi. 11-19 qyrkúıek aralyǵynda ótetin jıynǵa erler jáne áıelder komandalary qatysady. Sodan keıin dzıýdoshylar 19-23 qyrkúıekte Tashkentte bolatyn Gran-prı týrnırine attanady.
Eske sala keteıik, budan buryn Eldos Smetovtiń álem chempıonatynyń qola júldegeri atanǵanyn jazǵan bolatynbyz. Bul – Qazaqstan quramasynyń osy dúnıejúzilik dodadaǵy jalǵyz medali.
