Qazaqstandyq dzıýdoshy, álemniń vıtse-chempıony Maksım Rakov bıyl alǵash ret jeke týrnırge qatysady
ASTANA. 20 mamyr. QazAqparat - Qazaqstandyq dzıýdoshy, álemniń vıtse-chempıony Maksım Rakov bıyl alǵash ret jeke týrnırge qatysady, dep habarlaıdy Vesti.kz.
Aldymyzdaǵy demalystarda Reseıdiń Tıýmen qalasynda «Álemdik sheberler» týrnıri jalaýyn kóteredi. Oǵan Halyqaralyq Dzıýdo federatsııasynyń joǵary reıtingisinde turǵan álemniń eń myqty 16 palýany qatyspaq.
Bul dodada Qazaqstan namysyn birden 5 dzıýdoshy qorǵaıtyn bolady. Tatamıge 60 kelige deıingi salmaq dárejesinde Ashat Telmanov pen Eldos Smetov, 66 kelige deıingi salmaqta - Sergeı Lım, 90 kelide - Islam Bozbaev jáne 100 kelige deıingi salmaqta Qazaqstan quramasynyń kóshbasshysy - Maksım Rakov shyqpaq.
Rakov óz salmaǵynda «Álemdik sheberler» týrnıriniń qazirgi chempıony bolyp tabylady. 2012 jyly ol Almatyda ótken týrnırde birinshi oryn alǵan bolatyn. Sonymen qatar Maksım bul saıystyń eki márte qola júldegeri (2010, 2011 jyldar).
«Biz «Álemdik sheberler» týrnırine Túrkııada daıyndalýdamyz. Tıýmenge Antalııadan attanamyz. Alǵash ret atalmysh dodaǵa Qazaqstan elinen 5 dzıýdoshy qatysady. Bul - úlken jetistik. Kóńil-kúı jaqsy, Rakovtan úlken nátıje talap etpeımiz, sebebi ol jarystarǵa kópten beri qatysqan joq bolatyn», - dedi Qazaqstannyń dzıýdodan bas jattyqtyrýshysy Ermek Imanbekov.
«Álemdik sheberler» týrnıri 25 mamyr kúni Tıýmen qalasynda ótedi.
