Qazaqstandyq djıtserler alǵash ret ADCC chempıonatyna qatysady
ALMATY. QazAqparat - Búgin túnde qazaqstandyq sportshylar Osmanjan Qasymov pen (77 kg) pen Arman Janpeıisov (99+ kg) Almatydan Fınlıandııaǵa attandy, dep habarlaıdy QazAqparat tilshisi qalalyq sport habyna silteme jasaı otyryp.
«KazakhstanTopTeam» klýbynyń sportshylary 23-24 qyrkúıekte Espoo qalasynda ótetin greplıngten ADCC (Abu-Dhabi Combat Club) álem chempıonatynda el namysyn qorǵaıdy.
ADCC álem chempıonatyna qatysý úshin djıtserler irikteý kezeńderinde jeńiske jetý qajet. Nemese uıymdastyrýshylardyń shaqyrýymen ǵana qatysa alady. Bizdiń sportshylar irikteý kezeńderinen súrinbeı ótip, álem birinshiligine joldama aldy. Olar Qazaqstan chempıonaty men Azııa jáne Okeanııa birinshiliginde jeńimpaz atanyp, el mereıin ústem etti.
«Álem chempıonatyna daıyndyq eki kezeńde ótti. Birinshi kezeń AQSh-ta, Kalıfornııa shtatynda bastaldy. Biz «Brasilian Top Jym» klýbynda, Djýlıana Prado bapkeriniń qol astynda daıyndaldyq. Tańerteń biz kardıoǵa jumys jasap, kúres ádisterin meńgerdik. Al keshke kóbinese kúrestik. Bir jarym aıdan soń men Almatyǵa oralyp, «Kazakhstan Top Team» klýbynda daıyndyǵymdy jalǵastyrdym. Munda meniń bapkerim Adam Foks boldy. Ol menimen birge ADCC álem chempıonatyna baryp, qoldaý kórsetetin bolady. Jalpy, men óz qarsylastarymdy bilemin, biraq bul jaıynda oılamaýǵa tyrysamyn. Bul aıtýly dodada jaqsy kúres bolady dep oılaımyn. Biz alǵash ret el namysyn halyqaralyq arenada qorǵaıtyn bolamyz», - dedi sapar aldynda Osmanjan.
Arman Janpeıisov ta álem chempıonatyna daıyndyǵy týraly aıtty.
- Daıyndyq jaqsy ótti, joǵary deńgeıde desem de bolady. Maǵan bapkerim Adam Foks, sonymen qatar, dostarym men jaqyndarym úmit artyp otyr.
Qarsylastarym ózim qatarly sportshylar, tek ataqtary ǵana bolmasa. Alaıda, osy jyly, menińshe, jeńiske jetý úshin múmkindikterimiz teń, olar da biz sııaqty daıyndaldy, - dedi Arman.
ADCC álem chempıonaty 1998 jyldan bastap, eki jylda bir ret uıymdastyrylady. Dúbirli doda 6 salmaq boıynsha ótedi.
- Bizdiń sportshylar ADCC grepplıngten (Abu-Dhabi Combat Club) eń bedeldi jarysta baq synamaq. Barlyq sportshylar osy álem chempıonatynda beldesýdi armandaıdy, jeńbese de aıtýly dodaǵa qatysýdyń ózi olar úshin jetistik. Jarystar noý-gı (kımonosyz) grepplıng bólimi boıynsha ótkiziledi, sportshy qarsylasty tize búktirý nemese upaı sandary arqyly jeńe alady. Degenmen, erejelerge sáıkes aýyrtpaly tásilderdi qoldaný ruqsat etilgen. Biraq, olardyń basym bóliginen sportshyny jaraqat alýy múmkin. Osydan bolar, bul chempıonattan kóbisi bas tartady. Aıta ketsem, grepplıngte uryp-soǵýǵa bolmaıdy, tek kúres tehnıkasy qoldanylady, - dep atap ótti Federatsııa prezıdenti Tólegen Qumarov.
Іrikteý jarystary dúnıejúzi boıynsha ótkiziledi. Altyndy oljalaǵan sportshylarǵa, barlyq salmaq dárejesinde, kepildengen joldama men 10 000 dollar kóleminde aqshalaı syılyq beriledi. Іrikteý týrnırlerinde tek úzdik grepplerler beldesedi jáne de árqaısysy álem chempıonatyna joldama utyp alýǵa úmittenedi. Osy jyly álem birinshiliginiń jalpy júlde qory 206 600 dollar.
«Biz Osmanjan men Armanǵa sáttilik tileımiz. ADCC álem chempıonatynan Qazaqstanǵa oljaly oralyp, elimizdiń týyn bıikke jelbiretedi degen senimdemiz», - dedi Tólegen Qumarov.
