Qazaqstandyq doıbyshy jetinshi ret álem chempıony atandy
ORAL. QazAqparat – Kranevo qalasynda (Bolgarııa) doıby 64-ten jas erekshelikterine qaraı jastar arasynda álem chempıonaty máresine jetti, dep habarlaıdy QazAqparat tilshisi.
Doıbydan BQO quramasynyń aǵa jattyqtyrýshysy Danııar Jumageldıevtiń málim etkenindeı, dúnıejúzilik dodaǵa álemniń 15 elinen 200-deı doıbyshy qatysyp, baq synady.
Chempıonat doıbynyń rapıd, blıts jáne klassıka túrleri boıynsha ótkizildi.
Rapıdten Qazaqstan qorjynyna úsh medal tústi. Batysqazaqstandyq Altynaı Samatova 9 jasqa deıingiler arasynda álem chempıony atandy.
14 jasqa deıingiler arasynda taǵy bir batysqazaqstandyq Aıbek Esenǵalıev kúmis júldege ıe boldy. 20 jasqa deıingilerden Túrkistan oblysynyń ókili Esbol Erenǵaıyp qolany enshiledi.
Blıtsten 27 jasqa deıingiler arasynda batysqazaqstandyq Altynaı Jumageldıeva óz sporttyq jolynda jetinshi ret álem chempıony boldy.
A.Samatova taǵy bir altyn júldeni enshilese, oraldyq Toǵjan Tájibekova 17 jasqa deıingiler arasynda ekinshi orynǵa kóterildi.
Klassıkadan da aldyna jan salmaǵan A.Samatova óz jas ereksheligine sáıkes absolıýtti jeńimpaz atandy. T.Tájibekova klassıkadan úzdik shyǵyp, óz sporttyq jolynda úshinshi altynyna qol jetkizdi. Al A.Esenǵalıev klassıkadan úzdik úshtikke ilikti.
Osylaısha, Qazaqstan quramasy 5 altyn, 2 kúmis, 2 qola medaldi jeńip aldy.
Álem birinshiligi kezinde erler men áıelder arasynda komandalyq álem chempıonaty da ótti. Quramynda Altynaı Jumageldıeva men Toǵjan Tájibekova bar Qazaqstan komandasy blıts pen klassıkadan qola medalǵa ıe boldy.
Eske sala keteıik, budan buryn batysqazaqstandyq qos doıbyshynyń álem chempıony atanǵanyn jazǵan bolatynbyz.
