Qazaqstandyq doıbyshy álem chempıonatynyń qola júldegeri atandy
ORAL. QazAqparat - Doıby 64-ten jastar arasynda Bolgarııanyń Kranevo qalasynda ótken álem chempıonatynda batysqazaqstandyq Anel Dáýletova qola júldeger atandy, dep habarlaıdy QazAqparat tilshisi.
BQO dene shynyqtyrý jáne sport basqarmasynan túsken málimetke qaraǵanda, atalmysh dodaǵa álemniń 24 elinen 270-ten astam doıbyshy qatysty.
Oral qalasyndaǵy №2 balalar-jasóspirimder sport mektebinde jattyǵatyn Anel 13 jasqa deıingiler arasynda synǵa túsip, júldege ilikti. Onyń bapkeri - Álııa Jumageldıeva.
Aıta keteıik, A.Dáýletova bıyl Tashkent qalasynda ótken Azııa birinshiliginiń jeńimpazy atanǵan bolatyn, sol kezde oǵan halyqaralyq doıby federatsııasynyń sport sheberi sertıfıkaty tabys etilgen edi.
