Qazaqstandyq dombyrashylar Italııada bas júlde aldy

ASTANA. QazAqparat – Qazaqstandyq ınstrýmentaldy dýet Temirlan Oljabaev pen Ernat Naýryz Open Italy-2023 bedeldi mýzykalyq baıqaýynyń gran-prı júldesin jeńip aldy, dep habarlaıdy QazAqparat.

«Roza Baǵlanova atyndaǵy Qazaqkontsert» MKO solısteri Mádenıet jáne sport mınıstrliginiń qoldaýymen Italııanyń Pesaro qalasyna baryp óner kórsetken.

Jyl saıyn Pesaro qalasynda ótetin Open Italy-2023 sharasyna 24 elden qatysýshy jınalǵan. Olardyń arasynda qazaqstandyq dýet úzdik dep tanyldy.

«Bizdiń dýet «Adaı», «Kóroǵly», «Álqıssa» kúılerin, O.Súleımenovtiń West shyǵarmasyn oryndap, qazylar alqasy men kórermenderdi baýrap aldy. Temirlan men Ernatty jarqyn jeńisimen quttyqtaımyn. Jigitterdiń qazaq mýzykasyn oryndaı otyryp, halyqaralyq deńgeıde jetistikke jetkeni qýantady. Olardyń óneri basqa talantty otandastarymyzdy shabyttandyratynyna senimdimin», - dep quttyqtady Mádenıet jáne sport mınıstri Ashat Oralov Telegram jelisinde.

Aıta keteıik, Temirlan men Ernat Astanadaǵy Qazaq ulttyq óner ýnıversıtetinde oqyǵan jáne «Bastaý» dombyrashylar dýeti bolyp tanylǵan.

Olar 2018 jyly Latvııa astanasy Rıgada ótken «Eýropa mýzykalyq aspaptar» baıqaýynyń bas júldesin ıelenip, Gollıvýdqa joldama aldy. Sol jyly Izraılde Ierýsalımde ótken «Álem mýzykasy» halyqaralyq mýzyka festıvalinde bas júlde jeńip aldy. Túrkııada ótken BRIDE TV telearnasynyń mýzykalyq festıvalinde «Eń úzdik mýzykalyq top» degen arna marapatyn ıelendi.