Qazaqstandyq dıskobol Belarýsta ótetin týrnırge qatysady
ASTANA. QazAqparat - Belarýstyń Brest qalasynda KSRO-nyń eńbek sińirgen jattyqtyrýshysy Evgenıı Shýkeevıchti eske túsirýge arnalǵan jeńil atletıka týrnırine qazaqstandyq dıskobol Marııa Telýshkına qatysady, dep habarlaıdy QazAqparat tilshisi.
QR Jeńil atletıka federatsııasynyń taratqan málimetterine súıensek, dástúrli týrnır bıyl 26-28 sáýir aralyǵynda ótedi.
Evgenıı Shýkeevıch balǵa laqtyrýdan kóptegen sportshylardy daıyndaǵan jattyqtyrýshy. Vasılıı Rýdenkov, Romaýld Klım sekildi Olımpıada chempıondaryn tárbıelegen.
Bul jarys osymen 34-ret uıymdastyrylǵaly otyr. Jarystyń jyldan-jylǵa tanymaldylyǵy artyp, oǵan kóptegen belgili atletter qatysyp júr.
Brestte ıadro serpýshiler, naıza, balǵa, dısk laqtyrýshylar ártúrli jas kategorııasy boıynsha júldege talasady.
Dıskoboldar arasyndaǵy saıys 28 sáýir kúni jergilikti ýaqyt boıynsha 12:00-de bastalady.
Marııa Telýshkınanyń jeke bapkeri, 1980 jylǵy Máskeý Olımpıadasynyń qola júldegeri Tatıana Lesovaıa halyqaralyq dodalardyń sportshylar úshin mańyzy zor ekenin aıtady. Óıtkeni bizdiń atletter mundaı saıystarǵa az qatysady. Kez kelgen halyqaralyq jarys sportshyǵa sheberligin arttyrýǵa múmkindik beredi.
Foto: rsport.ria.ru
