Qazaqstandyq dırıjer Fýat Mansurov ómirden ozdy
ASTANA. Maýsymnyń 12-si. QazAqparat - Senbige qaraǵan túni tanymal dırıjer Fýat Mansurov ómirden ozdy, dep habarlady RIA «Novostı» agenttigine Úlken teatrdaǵy derekkózinen.
«Senbige qaraǵan túnde Fýat Shákiruly Mansurov dúnıeden ótti, ol uzaq jyldar boıy Úlken teatrdyń dırıjeri boldy», dedi derekkózi.
F.Mansurov Almaty qalasynda dúnıege kelgen. Qazaqstannyń, Reseıdiń jáne Tatarstannyń halyq ártisi. Qazaq memlekettik ýnıversıtetin, Almaty memlekettik konservatorııasyn jáne Máskeý memlekettik konservatorııasynyń aspırantýrasyn bitirgen. 50-shi jyldarda elimizdiń túrli orkestrlerine dırıjerlik etken ol Qazaqstannyń memlekettik akademııalyq sımfonııalyq orkestriniń derbes shyǵarmashylyq ujym retinde qalyptasý kezeńinde asa mańyzdy ról atqardy. Qazaq akademııalyq opera jáne balet teatrynyń bas dırıjeri bolyp, P.Chaıkovskııdiń «Evgenıı Onegın», M.Tólebaevtyń «Birjan - Sara», A.Jubanov pen S.Muhamedjanovtyń «Aısulý», t.b. operalyq spektaklderge jetekshilik etti. Sodan keıingi jyldary Máskeý memlekettik konservatorııasynyń oqytýshysy, professory, ýnıversıtet orkestriniń bas dırıjeri qyzmetterin atqardy. 1966 jyldan Memlekettik akademııalyq Úlken teatrdyń dırıjeri bolatyn. «Dostyq», «Qurmet belgisi» ordenderimen marapattalǵan.
