Qazaqstandyq dıplomattar shetel sarapshylaryn Parlament saılaýyna daıyndyq barysymen tanystyrdy
QR Syrtqy ister mınıstrliginen málim etkendeı, Qazaqstannyń shet elderdegi dıplomatııalyq ókildikteri 2021 jylǵy 10 qańtarda ótetin Parlament Májilisiniń depýtattaryn saılaýǵa daıyndyq jumystaryna belsendi qatysýda. Osyǵan oraı, birqatar sheteldik mekemelerde jergilikti sarapshylar men BAQ ókilderine arnalǵan brıfıngiler ótti.
«Gıbrıdti» formatta Ulybrıtanııanyń saıası jáne bıznes-ısteblıshmenti, sondaı-aq brıtandyq jáne halyqaralyq BAQ ókilderi úshin brıfıng ótkizildi. Qazaqstan Elshisi Erlan Ydyrysov óz sózinde elimizde saıası reformalardyń aýqymdy baǵdarlamasy belsendi júzege asyrylyp jatqanyn jáne aldaǵy daýys berý memlekettiń halyqaralyq standarttarǵa sáıkes saılaý ótkizýge beıildiligin rastaýǵa baǵyttalǵanyn atap ótti.
Naqty aıtqanda, eldiń saıası júıesin odan ári demokratııalandyrýǵa járdemdesý úshin saıası partııalardy tirkeý shegi eki ese – 40-tan 20 myń adamǵa deıin tómendetildi, qoldanystaǵy zańnamaǵa saıası partııalardan kandıdattar tiziminde áıelder men jastar úshin 30 paıyzdyq kvotany qamtamasyz etý úshin ózgerister engizildi. Jınalys erkindigin qamtamasyz etý bóliginde ulttyq zańnama yryqtandyryldy, al olardy uıymdastyrý tártibi ruqsaty túrden habarlandyrý tártibine ózgerdi», - delingen SІM aqparatynda.
Sondaı-aq Vılnıýste Qazaqstan Elshisi Vıktor Temirbaev ortalyq jáne óńirlik BAQ ókilderi men Lıtva Seıminiń depýtattary úshin brıfıng ótkizdi. Onyń barysynda saılaýǵa daıyndyqtyń uıymdastyrýshylyq kezeńderi, oǵan qatysatyn partııalar týraly aqparat berildi. Dıplomat saılaý eldiń odan ári saıası jańǵyrýy aıasynda «Halyq únine qulaq asatyn memleket» tujyrymdamasyn júzege asyrýdyń bastalýy arqasynda múmkin bolǵan jańa saıası jaǵdaıda ótetinine nazar aýdardy.
Al Qazaqstannyń Rýmynııadaǵy Elshisi Nurbah Rústemov osy eldiń BAQ-taryna arnalǵan brıfıng barysynda Memleket basshysy Qasym-Jomart Toqaevtyń «Qazaqstan jańa shyndyqta: is-qımyl ýaqyty» atty halyqqa Joldaýynda tujyrymdalǵan elimizdiń damýynyń basym baǵyttaryn atap ótti.
Dıplomat kóppartııalyqty damytý jáne Qazaqstannyń saıası ómirine azamattyq qoǵamnyń qatysýyn keńeıtý, parlamenttik oppozıtsııa ınstıtýtyn qurý jáne azamattardyń ózderiniń saıası quqyqtaryn tolyq júzege asyrýy úshin barynsha qolaıly jaǵdaı jasaýǵa baǵyttalǵan basqa da qadamdar týraly aıtyp berdi.
