Qazaqstandyq dıplomattar otandyq kıimdi kıetin bolady - Qaırat Ábdiraxmanov

«Bizdiń dıplomattar jyl saıyn kıim-keshekke arnalǵan aqshany alyp otyrady. Kelesi jyly 1 qańtardan bastap ol aqsha taǵy berile bastaıdy. Oǵan kostıým, kóılek, aıaq-kıim jáne taǵy basqa qajetti zattardy alý qajet. Endi, syrtta júrgende dıplomattardyń ústindegi kıim-keshek te durys bolýy kerek qoı. Kelesi jyldan bastap meniń barlyq qyzmetkerlerim dúkenge baryp, «Made in Kazakstan» degen jazýy bar kıim alsa eken deımin», - dedi Q.Ábdiraxmanov «Protecting business and investments» jobasynyń qorytyndysyna arnalǵan jıynda.
Mınıstrdiń aıtýynsha, dıplomattarǵa er adamǵa arnalǵan 200 kostıým, áıel adamǵa arnalǵan 200 kostıým, budan bólek, 400 kóılek, 500 galstýk tigip bere alatyn otandyq kásiporyn bolsa, syrtqy ister vedomstvosy atalǵan kásipkerlik nysanmen jumys isteýge daıyn.
«Osy bastamany naýqanshylyqqa aınaldyrmaı-aq qoıaıyq. Bárin óz jerimizde alýymyz qajet. Meıli, basqa eldiń ónimi bolsa da, ony tek Qazaqstanda ǵana satyp alamyz. Biraq birden eskertip qoıaıyn, bizdi aldaý qıyn. Óıtkeni shetelde jıi júremiz jáne ol jaqtaǵy baǵalardy jaqsy bilemiz. Áıtpese, baǵasyn «1 mıllıon teńge» dep jazyp qoıady da, 50 protsenttik jeńildikpen satady. Sonda bizge 500 myńǵa berip jatady. Al shetelde onyń baǵasy áldeqaıda tómen. Olaı bolmasyn», - dep atap kórsetti Q.Ábdiraxmanov.