Qazaqstandyq dıplomattar qazaqstandyqtardyń Chehııadan oralýyna kómektesýde
Qazaqstannyń Chehııadaǵy elshiliginiń málimetinshe, Chehııa koronavırýstyń taralýymen betpe-bet kelgen memleketterdiń biri. Tótenshe jaǵdaı engizilgennen keıin taýsylmaıtyn týrısterdiń aǵymyna úırengen Chehııa kósheleri bir sátte bosap qalǵan.
«Tańerteńnen bastap qazaqstandyq dıplomattar osy elde qalǵan bizdiń azamattarymyzǵa kómek kórsetý úshin jolǵa shyǵady. Otandastarymyz Chehııanyń ártúrli qalalarynda turady. Sondyqtan bir orynda baǵyt qurý qajet. Búgin Qazaqstan Respýblıkasynyń Elshisi Marat Tájınniń tapsyrmasy boıynsha qazaqstandyq dıplomattar Pragadan 120 shaqyrymda ornalasqan kishigirim Behın qalasyna orta mektepte bilim alatyn jas azamattardy osy qaladan evakýatsııalaý úshin jolǵa shyqty. Balalardyń keıbireýi jaqynda ǵana 16 jasqa tolǵan. Mektep bitirgennen keıin olar Praganyń joǵary oqý oryndaryna túsýdi josparlap otyr. Al qazir elge oralǵylary keledi», - dedi elshilikten.
Málim etilgendeı, Qazaqstanǵa sapar shegýshiler áýejaıǵa deıin QR Elshiligi usynǵan kóliktermen jetkizilgen.
«Barlyq balaǵa maska berildi. Balalardyń barlyq zaty kólikke artylǵannan keıin olar tikeleı Pragadaǵy halyqaralyq áýejaıǵa jol tartty. Joldar ábden bos, keıde baǵyttas kólikti kórýge bolady. Elde ómir toqtap qalǵan sııaqty. Praga áýejaıy bosap qalǵanyn kórýge bolady. Shetelden azamattardy qaıtarý úshin ǵana sanaýly reıs ushýda. Chehııa azamattaryna óz elinen ketýge tyıym salynǵan. Tótenshe jaǵdaı jáne karantın engizilgen», - delingen dıpókildik málimetinde.
Taratylǵan habarlamaǵa sáıkes, áýejaıǵa jetkennen keıin kóp keshikpeı «Belavıa» áýekompanııasynyń Praga-Mınsk reısine tirkeý men otyrǵyzý bastalǵan. Bul - búgingi kúni Chehııadan Qazaqstanǵa jetkizetin jalǵyz ǵana baǵyt. Basqa reıske tirkeý pýnkteri jabyq. Adamdar ózderiniń reısterin kútýde. Reıster únemi keıinge qaldyrylady.
«Jas azamattarǵa Behın qalasynan Pragaǵa deıin ádettegi kúnderi de jetý qıyn bolyp tur. Eń aldymen bir qalaǵa jetip, sol qaladan elektrıchkaǵa otyrý kerek. Bizdiń balalarymyzdyń Qazaqstanǵa oralýyna tolyqtaı qoldaý kórsetken chehııalyq dostar men áriptesterge alǵysymyzdy bildiremiz», - dedi elshilikten.
«Qazaqstanǵa oralý boıynsha kórsetken kómegi úshin QR Elshiligine alǵys bildirgim keledi. Álemdegi qazirgi ahýalǵa baılanysty Praganyń ózinde de júrip-turý qıyndap ketti. Bizge Elshilik áýejaıǵa jetý úshin kólik bóldi. Sondaı-aq maskalar, sýsyndar usyndy», - dedi Karına Logvınenko.