Qazaqstandyq dıplomattar Katar opera teatrynda qabyldaý uıymdastyrdy

ÁBÝ-DABI-DOHA. QazAqparat - Beısenbi kúni Dohada (Katar) «Katara Cultural Village» mádenı ortalyǵynyń opera teatrynda Qazaqstan Elshiligi QR Táýelsizdiginiń 25 jyldyǵyna arnalǵan saltanatty qabyldaý uıymdastyrdy, dep habarlady «QazAqparat» HAA menshikti tilshisi.

Sharaǵa Katar memleketiniń saıası elıta ókilderi, bıznesmenderi, Ádilet mınıstri Hasan ben Lahdan Sakr Al Mohannadı, ortalyq bank tóraǵasy sheıh Abdalla ben Saýd Al Tanı, «Katara Cultural Village» bas menedjeri Halıd ben Ibragım Al Sýlaıtı, Katar memlekettik organdarynyń joǵary laýazymdy ókilderi, Katarda akkredıttelgen dıplomatııalyq ókildik basshylary, áskerı, mádenı, ǵylymı qoǵam ókilderi men BAQ jáne qazaq dıasporasy qatysty.

Qabyldaýǵa kelgen qonaqtar nazaryna zamanaýı Qazaqstannyń qalyptasý tarıhy jaıly arnaıy fotokórme men «Astana EKSPO-2017» búkilálemdik kórmesi, Qazaqstannyń BUU Qaýipsizdik Keńesine turaqty emes músheligi, Almatyda ótetin 28-shi Ýnıversıada sekildi QR negizgi bastamalary jáne ózge de saıası, ekonomıkalyq jáne mádenı-gýmanıtarlyq saladaǵy elimizdiń jetistikteri týraly beınerolıkter usynyldy.

Qazaqstan Respýblıkasynyń Katar Memleketindegi Tótenshe jáne Ókiletti Elshisi Asqar Shoqybaev qonaqtarǵa óz sózinde Qazaqstannyń turaqty ishki saıası júıesi, zamanaýı ekonomıkalyq jáne qarjylyq ınstıtýttary, aýqymdy bilim berý jáne mádenı jobalary jáne eń bastysy halyqtyń ál-aýqatynyń artýyn qamtamasyz etken kópvektorly ishki saıasaty jáne halyqaralyq arenada abyroı-bedeli bar táýelsiz memleket retinde qalyptasyp úlgergenin atap ótti. Elshi Memleket basshysy Nursultan Nazarbaevtyń Táýelsizdiktiń alǵashqy jyldary qabyldaǵan basty sheshimderi men ustanymdaryn erekshe atap ótti.