Qazaqstandyq dıplomattar Dýbaıdaǵy otandastarynyń boryshtan arylýyna kómektesti
ASTANA. QazAqparat - Qazaqstannyń Dýbaıdaǵy konsýldyǵynyń qyzmetkerleri otandastarymyzdyń qarjylyq máselelerin sheshýge kómek kórsetti, dep habarlaıdy «QazAqparat» HAA tilshisi. Bul týraly QR SІM baspasóz qyzmetiniń basshysy Ánýar Jaınaqov óziniń Facebook-tegi paraqshasynda habarlady.
Bir jyl buryn qazaqstandyq otbasy úsh balasymen Dýbaıǵa kelip, jergilikti seriktesterdiń qoldaýymen dámhana ashady. Bıznestiń damymaýynyń saldarynan qazaqstandyqtar kafeni jalǵa berýshige 180 myń dırham nemese 50 myń dollar somasynda qaryz bolyp qalady. Ǵımarattyń ıesi aqshasyn qaıtarý úshin sotqa shaǵym túsiredi.
Otandastarymyzdyń qyzynyń naýqastanýyna baılanysty Dýbaıǵa kóshýge májbúr bolǵandyǵyn atap ótkenimiz jón. Ystyq qurǵaq klımat búldirshinniń saýyǵýyna yqpal etedi. Otanynan jyraqta júrgen qazaqstandyqtar kómek surap, Qazaqstannyń konsýldyǵyna keledi.
«Bul iske dıplomattarymyzdyń aralasýymen, alǵashqyda bul soma eki ese qysqartyldy, keıin bas konsýldyń ǵımarat ıesimen jeke kezdesýiniń arqasynda bizdiń otandastarymyzǵa eshqandaı shaǵym bildirmeıtini týraly kelisim jasaldy. «Sizge jáne sizdiń elińizge degen qurmet úshin», dep túsindirdi óz sheshimin iri dýbaılyq bıznesmen», - dep jazdy A.Jaınaqov.
Qazaqstandyq Dýbaıda qıyn jaǵdaıǵa tap bolǵanda kómekteskeni úshin Qazaqstannyń syrtqy ister mınıstri Qaırat Ábdrahmanovqa alǵys hat jazdy.
«Otanymyzdan alysta júrsek te, qoldaý kórsetip jatqandaryńyz úshin qýanyshtymyz», - dedi ol.
