Qazaqstandyq dıplomattar Astana marafonyna qatysady

Dıplomattar 10 jáne 42.2 shaqyrym qashyqtyqty júgirip ótedi.

«Komandada jańa oıynshylar da, tájirıbeli atletter de bar. QR SІM qyzmetkerleri Qazaqstanda da, shet memleketterde de sporttyq sharalarǵa belsene qatysady. Buqaralyq áýesqoı sportty damytýdy jáne nasıhattaýdy qoldaımyz. Dıplomattarymyzǵa jankúıer bolyńyzdar», - delingen baspasóz qyzmetiniń resmı habarlamasynda.

Komanda músheleri týraly málimetter:

1. Talǵat Jumaǵulov, Halyqaralyq aqparat komıtetiniń tóraǵasy - Astanada, Almatyda jáne Venada 13 marafonǵa, Óli teńizdiń jaǵasynda ótken júgirýge jáne trıatlonnan jarystarǵa qatysqan;

2. Aıbek Smadııarov, QR SІM baspasóz qyzmetiniń jetekshisi - Vetnamda Hanoi Half Marathon-ǵa, taýda júgirý boıynsha Giang Marathon-ǵa, Astanadaǵy BI Marathon-ǵa qatysqan;

3. Anýar Sarmantaev, Kópjaqty yntymaqtastyq departamentiniń Mádenı-gýmanıtarlyq yntymaqtastyq basqarmasynyń basshysy - baıdarka men kanoede esý boıynsha sport sheberi, birneshe marafonnyń qatysýshysy;

4. Erlan Ótegenov, Amerıka departamenti AQSh basqarmasynyń ekinshi hatshysy - London jáne Berlın marafondaryna, Ironman 70.3 jarysyna jáne trıatlonnan birneshe olımpıadalyq starttarǵa qatysqan;

5. Aıbek Amrın, Ákimshilik jáne baqylaý departamentiniń keńesshisi - Astanadaǵy BI Marathon, Highvill Skyrunning satylaı júgirýge jáne Run in the Dark túngi eko-marafonyna qatysqan;

6. Mahambet Eńsegenov, Halyqaralyq aqparat komıtetiniń ekinshi hatshysy - Shvetsııadaǵy Tough Viking jarysyna jáne Astandaǵy BI Marathon-ǵa qatysqan;

7. Arsen Omarov, Kópjaqty yntymaqtastyq departamenti dırektorynyń orynbasary -Jeneva marafonyna qatysqan;

8. Murat Rústemov, Syrtqy ekonomıkalyq saıasat departamentiniń Taldaý basqarmasynyń basshysy - marafonǵa alǵash ret qatysady;

9. Tursynǵalı Espanov, Basqarý jáne baqylaý departamentiniń ekinshi hatshysy - marafonǵa alǵash ret qatysqaly otyr.

Eske sala ketsek, erteń Astanada «Astana Marathon-2018» jyl saıynǵy halyqaralyq marafony ótedi. Sporttyq sharaǵa qatysýǵa Qazaqstannan jáne Germanııa, Reseı, Japonııa, Italııa, Ózbekstan, BAÁ, Shvetsııa, Ońtústik Koreıa, Ulybrıtanııa, AQSh, Qyrǵyzstan, Frantsııa, Túrkııa, Aýstralııa, Kenııa, Efıopııa, Erıtreıa, Grýzııa, Lıýksembýrg jáne Ispanııa syndy álemniń 20 memleketinen 4000-ǵa jýyq adam nıet tanytqan.

«Astana Marathon-2018» jasy 18-den asqan qatysýshylarǵa 42.2 km, al 16 jáne odan joǵary jastaǵylarǵa 10 km qashyqtyqty baǵyndyrýdy usynady. Marafonnyń eń qashyq dıstantsııasyn júgirip ótýge 6 saǵat ýaqyt beriledi. Bul reglamentte úlgermegen atletter dıskvalıfıkatsııalanyp, baǵyttan alynady.