Qazaqstandyq dıplomattar A.Tájaıaqov jáne D.Qadyrbaevpen kezdesti
Bul týraly QR SІM resmı ókili Altaı Ábıbýllaev áleýmettik jelidegi óz akkaýntyna jazdy. «Belgili bolǵandaı, 5 maýsymda amerıkalyq sot Azamat Tájaıaqovty tergeýge kedergi keltirgeni jáne sol maqsatta sóz baılasqany úshin aıypty dep tanyp, 42 aıǵa (3,5 jyl) bas bostandyǵynan aıyrý jazasyn kesti. Onyń 25 aıyn ol tergeý men sot úrdisi ýaqytynda ótegen bolatyn. Úlgili tártibi úshin onyń jazasyn óteý merziminiń 15 paıyzy (taǵy 6 aı merzimi) jalpy merzimnen qosymsha qysqartylýy múmkin», - delingen A.Ábıbýllaev habarlamasynda. D.Qadyrbaevtyń jaǵdaıy tárizdi, onyń da ári qaraı jazasyn óteý orny ázirge belgisiz. A.Tájaıaqovtyń advokattary amerıkalyq 4 túrme boıynsha usynymdy qaraý týraly D. Qadyrbaevtyń qorǵaý petıtsııasyna qosylady. Ázirge Qazaqstan men AQSh arasynda sottalǵan tulǵalardy qaıtarý týraly kelisimsharttyq-quqyqtyq baza joq. Eske sala keteıik, 2013 jylǵy 15 sáýirde halyqaralyq marafon kezinde Bostonda eki jarylys boldy. Lańkestik aktiniń saldarynan úsh adam qaza boldy, taǵy 260 adam ártúrli jaraqat aldy. Birneshe kún ótkennen keıin ony jasaýǵa kúdiktelgen Tamerlan Tsarnaev polıtseılermen atysta oqqa ushty. Djohar Tsarnaev boı tasalady, biraq ta keıinirek ol ustaldy. Lańkestik akti jasaýdan basqa ol polıtseıdi óltirýge de aıyptaldy. FBB málimetteri boıynsha, Tájaıaqov pen Qadyrbaev ózderiniń joldastary Djohar Tsarnaevtyń bólmesindegi aıǵaqtardy joıýǵa tyrysty. Olardyń qoqysqa tastaǵan aıǵaqtaryn keıinnen AQSh arnaıy qyzmetiniń qyzmetkerleri tapty. Qazaqstannyń qos azamaty Tsarnaevpen Massachýsetstegi ýnıversıtetten tanys bolǵan. Budan buryn FBB jarylys qondyrǵysyn ázirleý úshin paıdalanylǵan quraldardy bólmeden qalaı shyǵarǵany týraly olardyń aıǵaqtaryn jarııalaǵan bolatyn.
