Qazaqstandyq dıplomatqa «Pákistan juldyzy» marapaty tapsyryldy
«Baqytbek Shabarbaev 11 jyl boıy Qazaqstannyń Pákistandaǵy elshisi laýazymyn atqardy. Osy qyzmet jolynda eki el arasyndaǵy taýar aınalymy birneshe esege artty. Aıta ketsek, 1992 jyly Pákistanda Qazaqstan elshiligi ashylǵan kezde sol komandanyń múshesi bolǵan. Jalpy ol bizdiń elde 20 jylǵa jýyq ýaqyt qyzmet etti. Osy oraıda odan úlgi alarlyq jaǵdaılar barshylyq. Bul rette Baqytbek Shabarbaev biz úshin úlken qurmet pen abyroıǵa ıe», - dedi Pákistan Islam Respýblıkasynyń elshisi Sadjad Ahmed Sıhar.
Sonymen qatar ol B. Shabarbaevtyń Qazaqstan men Pákistan arasynda qarym-qatynasty nyǵaıtýǵa qosqan úlesin eskere otyryp, Pákistan Prezıdenti «Sıtara ı-Pákistan» marapatyn tabystaý sheshimin jasaǵanyn atap ótti.
«Bul marapat 2020 jyly tabystalýy tıis edi. Alaıda tıisti sebepterge baılanysty Baqytbek myrza Pákistanǵa bara almaı qaldy. Sondyqtan bul marapatty búgin Nur-Sultan qalasynda tabystaý rásimin uıymdastyrdyq. Pákistan Prezıdenti atynan Qazaqstannyń belgili dıplomatyn marapattaý biz úshin zor mártebe», - dedi Sadjad Ahmed Sıhar.
«Sıtara ı-Pákistan» - ol atalǵan eldiń joǵary azamattyq marapaty bolyp sanalady. Ony Pákistan Prezıdenti shetel azamattaryna eren eńbegi úshin tabystaıdy.
Eske sala keteıik, 2018 jyly qańtarda Memleket basshysynyń Jarlyǵymen «Qazaqstan Respýblıkasynyń memlekettik qyzmeti týraly» QR Zańyna sáıkes, zeınetkerlik jasqa tolýyna baılanysty Baqytbek Seısebaıuly Shabarbaev Qazaqstan Respýblıkasynyń Pákistan Islam Respýblıkasyndaǵy Tótenshe jáne Ókiletti Elshisi qyzmetinen, Qazaqstan Respýblıkasynyń Bangladesh Halyq Respýblıkasyndaǵy Tótenshe jáne Ókiletti Elshisi qyzmetin qosa atqarýdan bosatyldy. https://kaz.inform.kz/news/kazakstannyn-pakistandagy-zhana-elshisi-tagayyndaldy_a3133592
Baqytbek Seısebaıuly Shabarbaev 1954 jyly 1 qarashada Almaty oblysynyń Kóktal aýylynda dúnıege kelgen. Almaty pedagogıkalyq shetel tilderi ınstıtýtyn, Halyqaralyq qatynastar dıplomatııalyq sheteldik qyzmet akademııasyn (Pákistan) bitirgen.
Komsomol qyzmetinde, orta mekteptiń muǵalimi boldy. 1994 jyldan - QR-nyń Pákistandaǵy elshiliginiń attashesi, úshinshi hatshysy, Karachıdegi QR Konsýldyq pýnktinde birinshi hatshy, keńesshi boldy. 2002 jyldan QR SІM konsýldyq qyzmeti departamentiniń keńesshisi. 2004 jyldan QR Dıplomatııalyq mıssııasynyń keńesshisi. QR-nyń Cheh Respýblıkasyndaǵy elshiliginiń keńesshisi. 2005 jyldan - QR-nyń Taıland Koroldigindegi ýaqytsha ókili - BUU-nyń ESKATO janyndaǵy QR ókili. 2006 jyldyń maýsymynan 2018 jyl aralyǵynda Pákistan Islam Respýblıkasyndaǵy Tótenshe jáne Ókiletti Elshisi qyzmetin atqardy. Birneshe medaldarmen, QR SІM qurmet gramotasymen marapattalǵan.
