Qazaqstandyq dıplomat UQShU Syrtqy ister mınıstrleri keńesiniń jumys tobyn basqarady

ASTANA. QazAqparat - Máskeýde UQShU Syrtqy ister mınıstrleri keńesindegi Aýǵanstan boıynsha jumys toby men UQShU Qaýipsizdik keńesi hatshylary komıtetindegi terrorızm jáne ekstremızmmen kúres máseleleri boıynsha jumys tobynyń birlesken otyrysy ótti, dep habarlady Ujymdyq qaýipsizdik týraly shart uıymynyń saıtynda.

Sondaı-aq, birlesken otyrysqa Talıban, Ál-Kaıda jáne IGIL boıynsha BUU Qaýipsizdik Keńesi komıtetterindegi Monıtorıngtik top ókilderi qatysty.

Birlesken otyrysy barysynda Aýǵanstan Islam Respýblıkasy aýmaǵyndaǵy áskerı-saıası jaǵdaımen baılanysty máseleler talqylandy. Atap aıtqanda, Aýǵanstandaǵy IGIL men ózge de lańkestik uıymdar qyzmetiniń jandanǵany, eldiń ońtústigindegi turaqsyzdyqtyń soltústikke aýysqany, lańkestik pen ekstremızmniń UQShU jaýapkershiligindegi aımaqqa ótý qaýpi máseleleri kóterildi.

ıÝrıı Hachatýrovtyń aıtýynsha, bul máselelerdi sheshý aýǵanstandyqtar men barlyq múddeli taraptardyń kúsh-jigerin biriktirýdi talap etedi. Sol sebepti UQShU sáıkes halyqaralyq uıymdarmen, eń aldymen BUU beıindik qurylymdarymen Aýǵanstan máselesi boıynsha ózara yqpaldastyqty nyǵaıta túsedi.
 

Odan bólek, Máskeýde UQShU Bas hatshysynyń orynbasary Alymbaı Sultanovtyń jáne UQShU múshe-memleketterdiń Aýǵanstan boıynsha ulttyq úılestirýshileriniń qatysýymen UQShU Syrtqy ister mınıstrler keńesindegi Aýǵanstan boıynsha jumys tobynyń otyrysy ótti.

Aýǵanstan boıynsha jumys tobynyń jetekshisi retinde Qazaqstan Respýblıkasynyń Aýǵanstan boıynsha ulttyq úılestirýshisi, QR SІM Aıryqsha tapsyrmalar boıynsha elshisi Sergeı Vasılenko taǵaıyndaldy.

UQShU Syrtqy ister mınıstrleri keńesindegi Aýǵanstan boıynsha jumys tobynyń kelesi otyrysyn 2018 jyldyń qazan-qarasha aılarynda ótkizý josparlanǵan.