Qazaqstandyq dıplomat Ábdel Ázız Koroliniń I dárejeli ordenimen marapattaldy
ASTANA. QazAqparat - Astanadaǵy Saýd Arabııasy Koroldiginiń Elshiliginde Baqtııar Sardarbekuly Tasymovtyń Er-Rııadta Tótenshe jáne Ókiletti Elshi retinde atqarǵan mıssııasynyń aıaqtalýyna baılanysty qazaqstandyq dıplomatty joǵarǵy saýdtyq ordenimen marapattaý qurmetine saltanatty qabyldaý ótti, dep habarlaıdy QR SІM baspasóz qyzmetinen.
Saltanatty qabyldaýǵa QR SІM Jaýapty hatshysy Asqar Mýsınov jáne Qazaqstanda akkredıtatsııalanǵan dıplomatııalyq korpýs ókilderi qatysty. Saýd Arabııanyń QR-daǵy Elshisi Ábdel Májit Hakim B.Tasymovty Ábdel Ázız Koroliniń I dárejeli ordenimen marapattaý týraly Eki qasıetti orynnyń saqtaýshysy Abdalla koroliniń jarlyǵyn oqyp, óz el basshylyǵynyń tapsyrmasy boıynsha joǵary syıyn usyndy. «Eki qasıetti orynnyń saqtaýshysy Abdalla koroli men Qazaqstan Respýblıkasy Prezıdenti Nursultan Nazarbaevtyń arasyndaǵy turaqty jáne senimdi baılanystarynyń arqasynda, ekijaqty yntymaqtastyq dıplomatııalyq qatynastardyń ornyǵýynan bastap sátti damyp, alda odan ári keńeıe túsýine turaqty betalys alýda», - dep saýdııalyq dıplomat erekshe atap ótti. Á.Hakim Saýd Arabııasynyń Qazaqstanmen saýda-ekonomıkalyq jáne mádenı-gýmanıtarlyq salalarda ózara tıimdi yntymaqtastyqty odan ári damytyp tereńdetýge daıyn ekenin qaıta bildirdi.
Óz kezeginde, B.Tasymov saýdııalyq tarap onyń qyzmetin joǵary baǵalaǵany úshin alǵysyn bildirip, bul marapat, eń aldymen, Prezıdent N.Nazarbaev basshylyǵymen áleýmettik-ekonomıkalyq damýda edáýir jetistikterge jetip, halyqaralyq qaýymdastyqtyń senimdi, abyroıly múshesine aınalǵan Qazaqstannyń dostyq halqyna saýdtyq halqynyń kórsetken iltıpatyn bildiretindigin erekshe atap ótti.
