Qazaqstandyq desantshylar halyqaralyq armııa oıyndaryna qatysady

PSKOV. QazAqparat - V halyqaralyq armııa oıyndarynyń «Desanttyq vzvod» konkýrsyna qatysatyn áskerı qyzmetshileri Reseı Federatsııasynyń áskerı ataǵy shyqqan Pskov qalasyna kelip jetti, dep habarlaıdy QazAqpara «Batys» óńirlik qolbasshylyǵynyń baspasóz qyzmetine silteme jasap.

Baspasóz málimetterine qaraǵanda, qazaqstandyq komanda Pskovqa sońǵylardyń biri bolyp keldi. Desantshylardyń tasymaly Almaty-Aqtóbe-Chkalovsk-Pskov baǵytymen ótti. Saıysty uıymdastyrýshylar qazaqstandyq komandany erekshe kóńil men jylý júzben qarsy aldy. Otandyq desantshylardy saıys ótetin 76 gvardııalyq desanttyq-shabýyldaýshy dıvızııanyń úı-jaıyna qonystandyrdy.

Áskerı qyzmetshiler sý jańa kazarmanyń úı-jaılarynda ornalasty. Іshte qarý saqtaý bólmesinen, kıim jýatyn mashınalarǵa deıin kerek-jaraqtyń barlyǵy bar. Desantshylardyń kóńil kúıleri óte jaqsy. Erteńgi kúni olardy mádenı-tanymdyq serýen men birinshi jattyǵýlary kútip tur.

Qazaqstandyq áskerı qyzmetshilerdi kútip alǵan dıvızııa komandıriniń orynbasary polkovnık Roman Samohın osy saıysqa qazaqstandyq desantshylardyń qatysýy saıystyń dárejesin kóterip, mártebesin asyratynyn jasyrmady. Sebebi, bizdiń desantshylar postkeńestik elderdiń ishinde eń myqtylardyń biri bolyp tanylǵan.

«Bıylǵy jylǵy V halyqaralyq armııalyq oıyndar 3-17 tamyz aralyǵynda, 10 eldiń aýmaǵynda ótetin bolady. Olar: Ázerbaıjan, Armenııa, Belarýs, Iran, Úndistan, Qazaqstan, Qytaı, Mońǵolııa, Reseı men Ózbekstan. «Desanttyq vzvod» konkýrsyna uzyn sany 20 eldiń ókilderi qatysatyn bolady»,-delingen habarlamada.