Qazaqstandyq desantshylar «Búrkit-2» jańa júıesin ıgerýde

ASTANA. QazAqparat - Qapshaǵaıdaǵy 32363 áskerı bóliminiń bazasynda áýe desanty daıarlyǵy mamandarynyń onkúndik jıyny ótip jatyr. Bul týraly QR Qorǵanys mınıstrliginiń baspasóz qyzmetinen habarlady.

Nusqaýshy ofıtserlerdiń daıarlyǵy jónindegi josparly sharaǵa «Qazbat» bitimgershilik batalony men Aeroutqyr áskerlerine qarasty birneshe bólimderdiń áskerı qyzmetshileri qatysýda.

Jıyn barysynda áýe desanty daıarlyǵynyń mamandary «Búrkit-2» dep atalatyn jańa parashıýttik júıeni meńgerýleri kerek. Bul júıe arnaıy maqsattaǵy kúshter men barlaý bólimshelerine arnalǵan. Sonymen qatar, avıatsıalyq kóliktiń barlyq túrinde qoldanylady.

Jıyn jetekshisi polkovnık Vıktor Jıtnık sharanyń nátıje beretinine senimdi. Sebebi, jıynǵa qatysýshylar ózderine qoıylǵan mindetterdi oryndaýǵa, kásibıligin arttyrýǵa jáne áskerı qyzmetshilerdiń áýe desanty daıarlyǵyn tıisti deńgeıde qamtamasyz etýge daıar.

Bıyl Aeroutqyr áskerleri «Búrkit-2» júıesiniń júzden astam jıyntyǵyn aldy. Jıynnan soń mamandar (olardyń úzdikterine «Áýe desanty daıarlyǵynyń nusqaýshysy» ataǵy beriledi) áskerı qyzmetshilerdi parashıýt isiniń qajetti daǵdylaryna oqytatyn bolady.