Qazaqstandyq delegatsııanyń Túrkııaǵa saparynyń barysynda eki eldiń Keden odaǵy aıasyndaǵy yntymaqtastyǵy talqylandy
ASTANA. Mamyrdyń 11-i. QazAqparat - QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev mamyrdyń 3-4-i kúnderi Túrkııa Respýblıkasynda saparmen bolyp qaıtty.
Mınıstrdiń ózi bastap barǵan delegatsııanyń quramynda Pavlodar oblysynyń ákimi Baqytjan Saǵyntaev, Aqtóbe jáne Soltústik Qazaqstan oblystary ákimderiniń orynbasarlary, memlekettik holdıngterdiń, ulttyq kompanııalardyń jáne jeke sektordyń ókilderi boldy.
Sapar barysynda Áset Isekeshev Túrkııa Prezıdenti Abdýlla Gúldiń qabyldaýynda boldy jáne Túrkııa Respýblıkasy Premer-mınıstriniń orynbasary ári Memlekettik mınıstri Álı Babajanmen, sondaı-aq Memlekettik mınıstr Zafer Chaǵlaıanmen kelissózder júrgizdi.
Kelissózderge - qazaq-túrik qatynastarynyń ekonomıkalyq salasyndaǵy máseleleri, túrik óndiris oryndarynyń qatynasýymen Qazaqstanda ındýstrııalyq aımaq qurý, eki eldiń Reseı, Belarýs jáne Qazaqstan arasyndaǵy Kedendik Odaq aıasyndaǵy saýda jáne ınvestıtsııalyq yntymaqtastyǵyn jedeldetý máseleleri arqaý boldy.
Atap aıtqanda, Túrkııa Respýblıkasynyń Prezıdenti Abdýlla Gúlmen bolǵan kezdesýdiń barysynda, Elbasy Nursultan Nazarbaevtyń bastamasymen qurylǵan Túrki Halyqtarynyń Keńesi tóńireginde saýda-ekonomıkalyq jáne ǵylymı-tehnıkalyq yntymaqtastyqqa baılanysty máseleler jáne Túrkııa Prezıdentiniń Qazaqstanǵa jasaıtyn aldaǵy is-saparyna qatysty máseleler sóz boldy.
Áset Isekeshevtiń Túrkııa Memlekettik mınıstri Álı Babajanmen bolǵan kezdesýinde Túrkııa ekonomıkasyn tolǵandyratyn suraqtar bolyp tabylatyn ári 2009 jyldyń qazan aıynda qol qoıylǵan Strategııalyq áriptestik jónindegi kelissóz tóńireginde týysqan eki el arasyndaǵy ekonomıkalyq yntymaqtastyq máseleleri talqylandy. Atalmysh máseleler Túrkııanyń Syrtqy saýda jónindegi memlekettik mınıstri Z.Chalaıanmen bolǵan kezdesýde de jalǵasyn tapty. Bul júzdesýlerdiń barysynda A.Isekeshev osy jyldyń qańtar aıynyń 1-inen bastap kúshine engen Belorýssııa, Reseı jáne Qazaqstan arasyndaǵy Kedendik Odaqtyń ózara ınvestıtsııalyq jobalar úshin jańa múmkindikter ashatynyn atap ótti. Kezdesý sońynda jańa sharttar jaǵdaıynda eki el arasynda úkimetaralyq deńgeıde jumys jasap jatqan ózara ekonomıkalyq komıssııaǵa qosymsha ekonomıkalyq yntymaqtastyqtyń naqty ári tıimdi tetigin qurý jóninde kelisimderge qol jetkizildi.
