Qazaqstandyq delegatsııa UQShU Syrtqy ister mınıstrleri keńesiniń otyrysyna qatysty
Kezdesý barysynda UQShU-ǵa múshe memleketterdiń syrtqy saıası vedomstvolarynyń basshylary halyqaralyq jáne óńirlik jaǵdaı máseleleri boıynsha pikir almasty, sondaı-aq Uıym qyzmetiniń aǵymdaǵy jaǵdaıy men damý perspektıvalaryn talqylap, ózekti syn-qaterler men qaýipterge qarsy is-qımyl sharalarynyń keń aýqymyn qarady.
Qazaqstan SІM basshysy óz sózinde is-sharaǵa qatysýshylardyń nazaryn Qazaqstannyń Tuńǵysh Prezıdenti - Elbasy Nursultan Nazarbaevtyń senimdi nyǵaıtý jáne halyqaralyq shıelenisti báseńdetý joldaryn izdeý maqsatynda jetekshi álemdik derjavalar men halyqaralyq uıymdar arasyndaǵy dıalogty damytýdy qarastyratyn «Úsh D» jańa geosaıası shyndyq týraly bastamasyna aýdardy.
UQShU Ujymdyq Qaýipsizdik Keńesiniń sessııasyna daıyndyq sheńberinde syrtqy ister mınıstrleri tájik-aýǵan shekarasyndaǵy yqtımal shıelenisti azaıtý jónindegi sharalar paketin, 2019-2021 jyldarǵa arnalǵan BUU-nyń Jahandyq terrorızmge qarsy strategııasyn iske asyrý jónindegi UQShU elderiniń ujymdyq is-qımyl josparyn jáne UQShU daǵdarystyq áreket etý ortalyǵynyń aqparattyq ózara is-qımyl reglamentin maquldady.
Syrtqy saıası vedomstvolardyń basshylary 2019 jylǵa arnalǵan Birlesken ótinishter tizbesin, sondaı-aq Uıym qyzmetiniń barlyq baǵyttary boıynsha sarapshylardyń jyl saıynǵy keńes berý josparyn bekitti.
Otyrys qorytyndysy boıynsha, sondaı-aq NATO-ǵa múshe memleketterdiń SІM basshylaryna yntymaqtastyqty damytý jáne ózara senimdi nyǵaıtý týraly usynystarmen ashyq úndeý qabyldandy. Qujatta baǵalaý men aqparat almasý, qaýipti áskerı qyzmettiń aldyn alý tetigin qurý, oqý-jattyǵýlarǵa ózara shaqyrý, eki uıymnyń basshylyǵy men organdary arasyndaǵy tikeleı dıalogty damytý sııaqty birqatar praktıkalyq bastamalar bar.
Sondaı-aq, Bishkektegi kezdesýde Syrtqy ister mınıstrleri Belarýstiń Ekinshi dúnıejúzilik soǵys kezinde bosatylýyna 75 jyl tolýyna oraı birlesken málimdeme jasady.
Qyrǵyzstan astanasyndaǵy kezdesýdiń praktıkalyq nátıjeleriniń biri UQShU SІMK-niń Ujymdyq Qaýipsizdik Keńesine UQShU Bas hatshysy qyzmetine Belarýs Respýblıkasynan kelisilgen kandıdatýrany usyný týraly sheshimine qol qoıý boldy.
Jalpy, otyrys qorytyndysy boıynsha qabyldanǵan qujattar Uıymdy odan ári nyǵaıtýǵa baǵyttalǵan, al bul kezekti ret UQShU-nyń ashyqtyǵyn jáne onyń basqa eldermen jáne halyqaralyq qurylymdarmen yntymaqtastyqty keńeıtýge oń kózqarasyn kórsetti.
UQShU Syrtqy ister mınıstrleri keńesiniń kelesi otyrysy Bishkekte 2019 jylǵy 28 qarashaǵa josparlanǵan UQShU Ujymdyq Qaýipsizdik Keńesiniń sessııasy qarsańynda ótedi.
UQShU 2002 jylǵy 7 qazanda Kıshınev qalasynda quryldy. Belgili bolǵandaı, Uıymǵa Qazaqstannan basqa Armenııa, Belarýs, Qyrǵyzstan, Reseı jáne Tájikstan kiredi.
UQShU qurýdyń negizgi maqsattary beıbitshilikti, halyqaralyq, óńirlik qaýipsizdik pen turaqtylyqty nyǵaıtý, ujymdyq negizde uıymǵa múshe memleketterdiń táýelsizdigin, aýmaqtyq tutastyǵy men egemendigin qorǵaý bolyp tabylady, olarǵa qol jetkizýde saıası-dıplomatııalyq quraldarǵa basymdyq beriledi.
