Qazaqstandyq delegatsııa Nıý-Iorkte Adam quqyqtary jónindegi BUU pikirsaıysyna qatysty
Atalǵan forým BUU Bas Assambleıasy 70-shi sessııasynyń tóraǵasy Mogens Lıýkketofttyń bastamasymen shaqyrylǵan úshinshi qorytyndy is-shara bolyp tabylady. M. Lıýkketoft adam quqyqtary salasyndaǵy odan ári ilgerileýge qol jetkizýdi qoldaýdy óziniń ǵalamdyq uıymnyń negizgi organyndaǵy tóraǵalyǵynyń úsh basym baǵyttarynyń biri retinde jarııalady.
Plenarlyq sessııada M. Lıýkketoft, Uıymnyń Bas hatshysy Pan Gı Mýn, Belgııanyń Patshaıymy Matılda, 80-nen astam joǵary deńgeıdegi delegattar men azamattyq qoǵam ınstıtýttarynyń ókilderi sóz sóıledi.
Qazaqstandyq delegatsııa basshysy T. Ábishev óziniń plenarlyq otyrystaǵy baıandamasynda qatysýshylardy elimizde ulttyq adam quqyqtaryn qorǵaý júıesin nyǵaıtý jáne damytý boıynsha qabyldanǵan sharalar, osy saladaǵy memlekettik saıasattyń basymdyqtary týraly halyqaralyq qaýymdastyqty habardar etti. Delegatsııa basshysy Qazaqstannyń 2017-2018 jyldarǵa BUU Qaýipsizdik Keńesiniń turaqty emes múshesi bolyp saılanýy qoǵamdy odan ári demokratııalandyrý qyzmetine jańa serpin berýge tıisti ekenin atap ótti. Ol Qazaqstannyń BUU-men, halyqaralyq uıymdarmen jáne azamattyq sektormen ulttyq, óńirlik jáne jahandyq deńgeıde adam quqyqtaryn saqtaý jáne nasıhattaý boıynsha syndarly yntymaqtastyqty odan ári damytýǵa daıyndyǵyn bildirdi.
Sonymen birge, Qazaqstan delegatsııasy BUU júıesiniń joǵary laýazymdy tulǵalarynyń jáne quqyqtardy qorǵaý uıymdar men jeke sektordyń qatysýymen ótken forýmnyń úsh ınteraktıvti «dóńgelek ústelderine», sondaı-aq forým sheńberindegi birqatar taqyryptyq is-sharalarǵa (saıd-ıventterge) qatysty. Sapar barysynda Qazaqstan delegatsııasy BUU Bas hatshysynyń adam quqyqtary salasyndaǵy kómekshisi, Adam quqyqtary jónindegi Joǵarǵy komıssary basqarmasynyń Nıý-Iorktegi ofısiniń basshysy Ivan Shımonovıchpen kezdesti. Kezdesý barysynda oralmandardyń, azamattyǵy joq tulǵalardyń, bosqyndardyń, eńbekshi mıgranttardyń, adam saýdasy qurbandarynyń quqyqtaryn qorǵaý boıynsha BUU-men birlesken jobalardy talqylady. BUU-nyń joǵarǵy ókili ekijaqty yntymaqtastyqty oń baǵalady jáne ony odan ári damytýǵa daıyndyǵyn bildirdi. «Qazaqstan delegatsııasynyń joǵary deńgeıdegi pikirtalastarǵa belsendi qatysýy halyqaralyq qoǵamdastyqqa elimizdiń myqty ustanatynyn jáne adam quqyqtaryn kótermeleý jáne saqtaý jolyn qatań ustanatynyn taǵy da kórsetýge múmkindik berdi», - delingen baspasóz baıanynda.
