Qazaqstandyq delegatsııa «BRIKS jáne ShYU elderiniń stýdenttik kóktemi» festıvaline qatysty
4-9 maýsym aralyǵynda Stavropol qalasynda UNESCO aıasynda «BRIKS jáne ShYU elderiniń Stýdenttik kóktemi» ІІІ Halyqaralyq festıvali ótip jatyr. Festıval aıasynda memlekettik jastar saıasatyn júzege asyrýǵa jaýapty mınıstrlerdiń jáne vedomstvolar basshylarynyń kezdesýi ótti. Oǵan Qazaqstan Respýblıkasynyń Aqparat jáne qoǵamdyq damý mınıstrligi Jastar jáne otbasy isteri komıtetiniń tóraǵasy Madııar Qojahmet qatysty.
Kezdesý barysynda basshylar eldegi jastarmen jumys jasaýdyń jańa formattary, odan ári yntymaqtastyq ıdeıalary boıynsha pikir almasty, sondaı-aq jastardyń turaqty damý maqsattaryna qol jetkizýdegi úlesin talqylady.
Madııar Qojahmet óz sózinde Shanhaı Yntymaqtastyq Uıymy aıasynda jastar uıymdarynyń yntymaqtastyǵy týraly aıtyp, sondaı-aq qatysýshylardy Jastar jyly aıasynda Qazaqstanda memlekettik jastar saıasatynyń júzege asyrylý barysymen tanystyrdy.
Budan basqa, Madııar Qojahmet ShYU jáne BRIKS-qa múshe elderdiń jastar is-sharalarynyń halyqaralyq kúntizbesin túzý týraly bastamany usyndy. Bastama barlyq elder tarapynan biraýyzdan qoldaý tapty.
Festıvaldiń saltanatty ashylýy BRIKS jáne ShYU elderi jastar ujymdary men uıymdarynyń jáne 2,5 myńnan astam adamnyń qatysýymen ótti.
Qazaqstan atynan delegatsııa quramyna jastar uıymdarynyń kóshbasshylary men jas belsendiler kirdi, olar jas kóshbasshylar forýmy, jas jýrnalıster forýmy, ShYU jáne BRIKS elderiniń bilim berý forýmy sııaqty alańdarda jumys isteıdi.
Sonymen qatar, festıval aıasynda «Stýdenttik patshaıymy» Halyqaralyq Gratsııa jáne artıstik sheberlik baıqaýyn ótkizý josparlanyp otyr. Oǵan Q. Jubanov atyndaǵy Aqtóbe óńirlik memlekettik ýnıversıtetiniń stýdenti Perızat Erbolat qatysady.
Aıta keteıik, jastar saıasaty salasyndaǵy ShYU-men ózara is-qımyl ShYU Jastar keńesi aıasynda júzege asyrylýda. ShYU jastar keńesinde QR Ulttyq bóliminiń ókilderi Qazaqstan jastar kongresi men «Nur Otan» partııasynyń «Jas Otan» jastar qanaty bolyp tabylady.
