Qazaqstandyq Dáýlet Tóleýbaev AQSh Prezıdentinde qonaqta boldy
Stenford ýnıversıtetiniń golfshylar komandasynda óner kórsetetin otandasymyz NCAA (AQSh pen Kanadanyń JOO-lary men kolledjderi engen Ulttyq ýnıversıtettik sport qaýymdastyǵy) chempıony boldy.
Donald Tramptyń golf alańdarynda ótkizetin ýaqyty jóninde amerıkalyq baspasózde jıi talqylanady. Jýrnalısterdiń esebine sáıkes, onyń AQSh Prezıdenti laýazymyndaǵy kúnderdiń 23 protsenti golf oınaýmen ótken. Tramp atalmysh sport túrine arnalǵan bedeldi jarystardyń nátıjesin muqııat baqylap otyrady. Bul joly ony ózderiniń múltiksiz jeńisimen Stenford ýnıversıtetiniń komandasy tánti etken.
«Quramyna qazaqstandyq Dáýlet Tóleýbaev engen komanda sońǵy 12 jylda Ulttyq ýnıversıtettik sport qaýymdastyǵynyń qaıta chempıony boldy. Amerıkalyq tanymal telearnalar D.Tóleýbaevtyń tamasha oıynyn áli de kórsetip jatyr», - dep habarlaıdy «Habar 24».
Dáýlettiń aıtýynsha, bul – barlyq komanda músheleriniń jeńisi.
«Bul – Amerıka kolledjderi arasyndaǵy týrnır boldy. Men komandamyzdaǵy 5 golfshynyń birimin. Tórt kúndik oıynnan keıin «birge bir» matchyna kóshemiz. Jartylaı fınalda meniń oıynym sońǵy match boldy. Esepti 2:2-ge teńestire aldyq. Jáne sońǵy shuńqyrda óz matchymda jeńiske jettim. Osylaısha, fınalda komandama jeńis ákeldim. Bul, jalǵyz meniń ǵana nátıjem emes, árqaısymyz óz matchtarymyzda úzdik boldyq. Iá, men tek oǵan kómektestim», - deıdi ol.
Onyń sporttaǵy jáne oqýdaǵy tamasha jetistikterine álemniń úzdik ýnıversıtetteri nazar aýdaryp, Garvard, Prıston, Dıýk jáne Amerıkanyń ózge de bedeldi ýnıversıtetteri ózderinde bilim alýǵa shaqyrǵan. Biraq onyń tańdaýy Stenfordqa túsken.
«Qazaqstandy tanytyp júrgenime qýanyshtymyn. Qazir qazaqstanda sporttyń bul túri damyp keledi. Elimiz jas. Al AQSh-ta golftiń paıda bolǵanyna kóptegen jyldar boldy. Bizde alańdar jaqsartylýda, kóptegen ıýnıor golfshylar bar», - deıdi ol.
Al Dáýlettiń bapkeri Konrad Reı onyń erekshe minezin atap ótip, birneshe ret oıynnyń sheshýshi sátinde komandany jeńiske jetkizgenin aıtty.
«Dáýlet Stenford syndy álemdik deńgeıdegi ýnıversıtette jaqsy bilim ala otyryp, stýdent-sportshynyń úzdik beınesin qalyptastyrýda. Álemniń ózge bóligin tanystyryp júrgen ony bizdiń qatarymyzdan kórýge qýanyshtymyz...Prezıdent D.Tramp shamadan tys saıası qyzmetine qaramastan, sportqa kóńil bólip, komandalar men jeńimpazdarǵa qoshemet bildirdi. Ol ózi golfshy jáne bul – bizdi biriktiredi. Biz onymen áńgimelesip qana qoımaı, Aq úıdi de aralap shyqtyq», - deıdi Konrad Reı.
