Qazaqstandyq dárigerler Túrkııada ótken álem chempıonatynda jeńiske jetti

AQTÓBE. QazAqparat – 22-25 sáýir kúnderi aralyǵynda Túrkııada dárigerler arasynda shaǵyn fýtboldan álem chempıonaty ótti. Baıraqty básekede Qazaqstan quramasy jeńiske jetti, dep habarlaıdy QazAqparat tilshisi.

Túrkııada dárigerler arasynda fýtzaldan ekinshi álem chempıonaty uıymdastyryldy. Oǵan álemniń birneshe elinen 200-ge jýyq aq halatty qatysty.
«Qazaqstan qurama komandasynda Aqtóbe oblystyq perınataldyq ortalyqtyń neonatologi Ashat Jumaev, Aqtóbe medıtsına ortalyǵynyń neırohırýrgi Rýslan Qajǵalıev jáne kardıoreanımatolog Arman Amzeev bar. Salaýatty ómir saltyn nasıhattap, dárigerler arasynda shaǵyn fýtboldy damytý maqsatynda uıymdastyrylǵan álem birinshiligi kezinde Qazaqstan quramasy jeńiske jetti», - dep habarlady oblystyq densaýlyq saqtaý basqarmasynyń baspasóz qyzmeti.
Aıta keteıik, jarysqa barlyǵy 8 komanda qatysty. Birinshi oryndy Qazaqstan, ekinshi oryndy Ózbekstan, úshinshi oryndy Ýkraınanyń dárigerler quramasy enshiledi.
«Túrkııada ótken jarysqa qatysý úshin 2 aı boıy daıyndyq júrgizdik. Ózimizdiń jattyqtyrýshymyz da boldy. Bir ereksheligi, Qazaqstan qurama komandasy dep aıtqanymyzben, Aqtóbe men Jambyl oblysynan 9 adam jınaldy. Onyń jeteýi aqtóbelik. Jarys óte qyzyqty ótti. Ótken jyly Polshanyń Krakov qalasynda uıymdastyrylsa, bıyl Túrkııanyń Ankara qalasy tańdaldy»,- dedi komanda kapıtany Rýslan Qajǵalıev.