Qazaqstandyq dárigerler qytaılyq týrıst áıeldiń sábıin qutqaryp qaldy
ASTANA. QazAqparat - Astanalyq dárigerler EKSPO-2017 kórmesine kelgende bosanǵan qytaılyq áıeldiń sábıine kúrdeli ota jasady, dep habarlady «QazAqparat» HAA tilshisi.
«EKSPO-2017 halyqaralyq kórmesin medıtsınalyq qamtamasyz etý» taqyrybyndaǵy baspasóz konferentsııasynda Astana qalalyq densaýlyq saqtaý basqarmasynyń basshysy Kamaljan Nadyrov kórme kezinde bolǵan oqıǵa týraly aıtyp berdi.
«Qytaıdan kelgen júkti áıel EKSPO-2017 kórmesi kezinde Astanadaǵy №1 perınataldyq ortalyqta bosandy. Ókinishke qaraı náreste densaýlyǵynda aqaýmen týǵan. Dárigerlerimiz náreste ishegi men asqazanyna rekonstrýktıvti-qalpyna keltirý boıynsha kúrdeli ota jasady. Kelinshek balasymen birge emhanadan shyǵaryldy», - dedi Kamaljan Nadyrov.
Budan tys, ol EKSPO-2017 halyqaralyq kórmesi kezinde 8 917 adam medıtsınalyq kómekke júgingen. Sonyń 7 447-si Qazaqstan azamaty bolsa, 1 470-i 67 eldiń azamattary. Olardyń arasynda Germanııa, Shveıtsarııa, Japonııa, Malaızııa, Sıngapýr, Qytaı, Ońtústik Afrıka Respýblıkasy sııaqty alys-jaqyn shetelderden kelgen qonaqtar boldy.
Kamaljan Nadyrovtyń aıtýynsha, naýqastardyń basym kópshiligine kórsetilgen medıtsınalyq járdem sátti bolǵan, medıtsınalyq qyzmetter uıymshyldyqpen, joǵary kásibı deńgeıde jumys istegen.
«EKSPO-2017 halyqaralyq mamandandyrylǵan kórmesiniń barlyq qatysýshylary men qonaqtaryna sapaly, qoljetimdi medıtsınalyq qyzmetter der kezinde kórsetilip otyrdy», - dedi ol.
