Qazaqstandyq dárigerler Ebola bezgegimen kúresýge daıyn
ASTANA. QazAqparat - Qazaqstandyq dárigerler Ebola vırýsymen kúresýge daıyn. Bul týraly Densaýlyq saqtaý mınıstrliginiń basty shtattan tys ınfektsıonısti Baqyt Kósherova habarlady, dep jazady Kazpravda.kz.
«Otandyq dárigerler árqashan daıyn. Aı saıyn, ásirese sońǵy oqıǵalardan keıin erekshe qaýipti ınfektsııalardyń aldyn alý jáne qarsy áreket etý boıynsha únemý oqytý jumystary júrgiziledi. Ol osyǵan deıin júrgizilgen jáne aldaǵy ýaqytta da jalǵasyn tabady», - dep sendirdi Kósherova.
Onyń sózine qaraǵanda, Qazaqstanda erekshe qaýipti ınfektsııalardy juqtyrǵan naýqastardy emdeý ádisi bar. Ebola bezgegi osy sanatqa jatady.
«Eger Qazaqstanda osyndaı jaǵdaılar bolsa, bizde mindetti túrde jeke kirip-shyǵatyn orny bar gospıtal jaıylady. Barlyq ınfektsııalyq statsıonarlarda bizde obaǵa qarsy kıimder bar, dárigerlerdiń bári erekshe qaýipti ınfektsııaly naýqaspen qalaı jumys isteý kerektigin biledi», - dep atap ótti ol.
Vırýs eshqashan juqpaıdy dep aıtýǵa bolmaıdy, deıdi sarapshy. Infektsııanyń birneshe taralý joly bar. «Qazaqstannyń sanıtarlyq epıdemıologtary álemde bolyp jatqan oqıǵalarǵa dereý nazar aýdary, aldyn alý şaralaryna birden kirisedi. Qazirgi ýaqytta bizdiń el aýmaǵyna Afrıkadan kelýshiler qatań baqylaýǵa alynǵan», - dep qosty dáriger.
Eske sala keteıik, Qazaqstannyń basty memlekettik sanıtarlyq dárigeri Jandarbek Bekshın azamattardan múmkindiginshe Ebola vırýsy taraǵan elderge barmaýdy surady. Aýrýdyń belgileri bilingen jaǵdaıda, birden medıtsınalyq kómekke júginý kerek, degen bolatyn qazaqstandyqtarǵa qarata aıtqan sózinde Bekshın.
