Qazaqstandyq dárigerler 200 kún boıy aqmolalyq jasóspirimniń ómiri úshin kúresti
ASTANA. QazAqparat - 200 kún boıy qazaqstandyq dárigerler denesiniń 50%-yn kúıik shalǵan aqmolalyq jasóspirimniń ómirin saqtap qalýǵa kúsh jumsady. Uzaq ýaqyttan keıin aýrýhanadan shyǵarylǵan Bekzat úıine, ata-anasynyń janyna oraldy, dep habarlaıdy «QazAqparat» HAA QR Densaýlyq saqtaý mınıstrliginiń Feısbýktegi paraqshasyna silteme jasap.
Ótken jyldyń shilde aıynda Bulandy aýdanynda turatyn 23 jastaǵy jigit ózin-ózi órtegen bolatyn. Onyń 15 jastaǵy inisi órtti sóndirýge talpynǵanymen, aǵasyn qutqaryp qala almady. Bulandy aýdandyq ortalyq aýrýhanasyna asa aýyr jaǵdaıda jetkizilgen jigittiń denesiniń 50%-yn kúıik shalǵan. Kóp uzamaı sanıtarlyq avıatsııa toby naýqasty Aqmola oblystyq balalar aýrýhanasyna jetkizdi.
«Biz sońǵy sátke deıin qandaı da bir boljam jasaýǵa qoryqtyq, óıtkeni barlyq aǵzalardyń ishki isip qyzarý protsesi - óte aýyr. Kúıik aýrýlarynyń naýqas ótkerýge tıisti mindetti kezeńderi bolady. Kúıiktik shok nemese kúıikten ýlaný kezeńderine aýrýdyń qalaı tótep beretinin boljaýdyń ózi múmkin emes. Degenmen biz jeńdik! Bekzatqa on ret terini aýystyryp ornalastyrý otasy jasaldy. Ol osynyń bárinde erlik kórsetip, bizge kómegin tıgizdi. Aıaǵynan tik turýǵa asyqqanymen, barlyq talaptardy buljytpaı oryndap otyrdy», - deıdi kúıik aýrýyn emdeýshi dáriger Petr Redkozýbov.
Aýrýhanada ótken uzaq ýaqyttan keıin Bekzat ata-anasynyń janyna oraldy. Ony áli uzaq ońaltý kezeńderi kútip tur. Ol ózin-ózi kútýdi, júrýdi, zattardy qolymen ustaýdy basynan bastap qaıtadan úırenip jatyr.
«Úıge oralýymdy uzaq kúttim. Aýyr árıne, biraq qorqynyshtyń bári artta qaldy. Tek aýrýyma baılanysty oqýdy tastaýyma týra keletini ókinishti. Biraq muny da jeńip shyǵatynyma senemin. Barlyq dárigerlerge raqmet», - dep alǵysyn bildirdi Bekzat.
