Qazaqstandyq tsırk ártisteri Monte-Karloda ótken festıvalde «Kúmis kloýn» júldesin jeńip aldy

Bul týraly QazAqparat tilshisine Qazaq memlekettik tsırkiniń shetel bóliminiń basshysy Rahmatýlo Sharıpov málim etti.

Onyń aıtýynsha, Álisher Alıevtiń jetekshiligindegi 5 ártisten turatyn «Aq qustar» trýppasy «Áýedegi ushý» nómirin qoıyp, kórermen men ádil qazylar alqasyn tań qaldyrǵan. «Óıtkeni, bul top áýe janryndaǵy eń qıyn trıýkti jasady. Qarapaıym tilmen aıtqanda, áýede úsh ret tikesinen aınaldy. Mundaı trıýkti álemdik tsırk tarıhynda eshkim jasaǵan emes. Sondyqtan, bizdiń ártisterdi Gınnestiń rekordtar kitabyna engizeıin dep jatyr», -dep qýanyshymen bólisti Rahmatýlo Sharıpov. Onyń aıtýynsha, baıqaý asa tartysty bolǵan.

Birinshi oryndy osymen úshinshi ret Italııanyń tsırk ártisi Flavıo Tonı jeńip alǵan. Ol baıqaýǵa bes nómer ákelgen, onda pilder, jolbarystar, túıeler men attar óner kórsetken. Ekinshi altyn júldege AQSh-nyń kloýny ıe bolǵan.

Kúmis júldeni sondaı-aq qazaqstandyq ártistermen qatar Qytaı, Kanada ártisteri bólisken. Sonymen qatar, baıqaýda tórt qola júlde sarapqa salynǵan.

Bıylǵy tsırk festıvalinde 10 eldiń - Qazaqstan, Reseı, AQSh, Qytaı, Italııa, Germanııa, Frantsııa, Kanada, Brazılııa men Rýmynııa elderiniń eń úzdik degen 18 trýppalary qatysqan. Ádil qazylar quramyna Reseı, Qytaı, Japonııa, Germanııa, Gollandııa, Ulybrıtanııa elderiniń ókilderi kirgen.