Qazaqstandyq bylǵary qolǵap sheberleriniń Bokstan álem chempıonatyndaǵy qarsylastary aıqyndaldy
TANA. 26 qyrkúıek. QazAqparat - 25 qyrkúıek kúni Bakýde álem birinshiligine qatysatyn boksshylarǵa jerebe tastaldy.
Sportshylar tańerteńgi salmaq ólsheý rásiminen ótkennen keıin AIBA baıraqty básekege qatysýshylar sanyna oraı sońǵy málimetterdi jarııa etti. Chempıonatqa álemniń 113 elinen 517 bylǵary qolǵap sheberi qatysady, dep habarlady Astana qalalyq týrızm, dene shynyqtyrý jáne sport basqarmasynyń baspasóz qyzmetinen.
Qarsylastardy irikteý kompıýterdiń kómegimen júzege asyryldy. Sonymen Baký sharshy alańyna eń birinshi kóteriletin 49 keli salmaq sanatyndaǵy Birjan Jaqypov kýbalyq Iosvanı Veıtıamen judyryqtasady. Aıta keterligi, 19 jastaǵy kýbalyq boksshy álemdik deńgeıdegi jarysqa alǵash ret shyǵyp otyr. Bul jupta basym túsken bylǵary qolǵap sheberi aǵymdaǵy jylǵy Eýropa chempıonatynyń jeńimpazy bolgarııalyq Georgııa Andonovpen kezdesedi.
52 keli salmaq dárejesinde judyryqtasatyn Oljas Sáttibaev 27 qyrkúıek kúni marokkalyq Abdelfattah Nafılıaǵa qarsylyq tanytady. Bul salmaqta 59 boksshy óz baǵyn synaıdy.
Al 60 keli salmaq dárejesinde sharshy alańǵa álemniń 66 eliniń ókili kóteriledi. Elimizdiń eki márte chempıony, 2010 jylǵy stýdentter arasyndaǵy álem chempıonatynyń jeńimpazy Ǵanı Jaılaýov alǵashqy jekpe-jegin 1 qazan kúni japondyq Shota Nakaıamamen ótkizedi. Álemniń 67 bylǵary qolǵap sheberi qatysatyn 64 kelige deıingi salmaq sanatynda Qazaqstan namysyn qorǵaıtyn Danııar Eleýsinov 30 qyrkúıek kúni shotlandyq boksshy Djosh Teılormen jekpe-jekke shyǵady. Serik Sápıev 29 qyrkúıek kúni ekvadorlyq Karlos Sanchezben kezdesedi. Aıta keterligi, S.Sápıev judyryqtasatyn 69 keli salmaq sanatynda 63 boksshy sharshy alańǵa shyǵady.
75 keli salmaq sanatynda 67 boksshy álem chempıony ataǵy alý úshin baryn salmaq. Bul salmaqta sharshy alańǵa 1 qazan kúni shyǵatyn Danabek Sýjanovtyń qarsylasy Taıpeıli ıAng ıÝ Tınga. Al Ádilbek Nııazymbetovtiń (81 keli) alǵashqy qarsylasy moldavandyq Vladımır Cheles. Jarys jolyn ekinshi aınalymnan bastaıtyn astanalyq Vasılıı Levıt 3 qazan kúni Vılms (AQSh) pen Dırnfıld (Slovakııa) arasyndaǵy jeke jektiń jeńimpazymen judyryqtasady. Álem chempıonatyna aýyr salmaqtaǵy 40 boksshy qatysady. 2 qazan kúni sharshy alańǵa kóteriletin Ivan Dychkonyń qarsylasy «Astana Arlans» komandasynyń quramynda óner kórsetken serbııalyq legıoner Mılýtın Stankovıch bolmaq.
«Bizdiń bapkerler boksshylardyń daıyndyǵy óte joǵary bolǵandyǵyn aıtýda.
Qazaqstan boks federatsııasy bul álem chempıonatynda Olımpıada oıyndarynyń 5 lıtsenzııasyn jáne 1 altyn, 1 kúmis, 1 qola medal utyp alýdy maqsat etip otyr. Árıne, biz quramanyń chempıonatqa laıyqty daıyndyqpen kelýi úshin qolymyzdan kelgenniń bárin jasadyq. Jerebege qatysty aıtar bolsam, 49 keli salmaq sanatyndaǵy Jaqypovqa kýbalyq óte kúshti boksshy tap keldi. Ol jastar arasyndaǵy álem chempıonatynyń qolasyn utyp alǵan bolatyn. Degenmen, meniń oıymsha, bizdiń boksshynyń bul qarsylasty utýy úshin tájirıbesi de, kúshi de jetedi», - deıdi Qazaqstan Boks federatsııasynyń vıtse-prezıdenti Serik Qonaqbaev.
