Qazaqstandyq býkmekerler «Oıyn bıznesi týraly» zańnyń ózgeristerine qarsy shyqty
ALMATY. QazAqparat – Qazaqstandyq býkmekerler baspasóz máslıhatyn ótkizip, «Oıyn bıznesi týraly» zańǵa engizilgeli otyrǵan ózgeristerge qarsy shyqty, dep habarlaıdy QazAqparat tilshisi.
Baspasóz máslıhatynda býkmekerler Májiliste «Oıyn bıznesi týraly» zańǵa ózgerister engizgeli jatqan jumys tobynyń bastamasyna alańdaýshylyq bildirip otyr. Zańǵa engiziletin ózgerister býkmekerlik keńselerdiń kassalarynyń bárin de arnaıy belgilengen «rezervatsııaǵa» nemese «qumar oıyndar aýmaǵyna» kóshirýdi kózdeıdi. Naqtyraq aıtqanda, ol aýmaqtar - Aqmola oblysynyń Býrabaı aýdany men Qapshaǵaı sý qoımasyndaǵy núkte. Sondaı-aq býkmekerlik qyzmetpen baılanysty barlyq esepshilik stavkalardy esepteý ortalyǵyn qurý josparlanǵan.
«Negizinde, zań jobasyn ázirleý máselesin biz kótergen joqpyz. Tek óz usynystarymyzdy bildirgen edik. Tipti «Oıyn bıznesi týraly» zańnyń ózi qumar oıyndar men stavkalardy retteıdi. Al býkmekerlik oıyn - qumar oıyn emes, jaı stavka. Álemniń kóptegen elinde sporttyq «bekıng» týraly zań bar. Bizdiń bıznes-stavkalarymyz sporttyq is-sharalar kezinde ǵana jasalady. ıAǵnı, biz kazıno da, qumar oıyn avtomattary bólmesi emespiz. Biz - bıznestiń múlde basqa túrindemiz. Árıne, jeke zańǵa saı júrgizýdi qalaımyz», - dedi Qazaqstan býkmekerler qaýymdastyǵynyń tóraǵasy Aıtýar Madın baspasóz máslıhatynda.
Brıfıngte sóz sóılegen býkmekerlik keńestiń ókilderi zań jobasyn qabyldaý jaǵymsyz saldarǵa ákelýi múmkin ekenin atap ótti. Olar býkmekerlerdiń 5 myńǵa jýyq qyzmetkeri jumyssyz qalatyny, al Esep ortalyǵy býkmekerlerdiń klıenttik bazasynda derbes derekterdi jınaı alatyny jaıly argýmentti alǵa tartady.
Olardyń aıtýynsha, býkmekerler bıýdjetke jylyna 20 mlrd teńge tólep otyr.
