Qazaqstandyq boıjetken Tashkenttegi sulýlyq baıqaýynyń jeńimpazy atandy
TAShKENT. QazAqparat - 24 jastaǵy qazaqstandyq model Ázıza Toqashova Tashkentte ótken «Miss Union Fashion-2019» IV Halyqaralyq baıqaýynda jeńimpaz atandy, dep habarlaıdy QazAqparat tilshisi.
«Qazaqstandyq model «Miss Union Fashion-2019» baıqaýynyń bas júldesin jeńip aldy», - dep jazdy Ázıza Toqashova Instagram Stories-inde.
Atalmysh baıqaýǵa Azııa, Afrıka, Eýropa elderiniń ókilderi qatysty. Árbir qatysýshy óz stılinde eliniń mádenıeti men dástúrin pash etti. Tóreshiler qatysýshylarǵa úsh baǵyt - syrtqy kelbeti, ıntellektýaldyq qabileti jáne ulttyq mádenıetti tanystyrý talaptary boıynsha baǵa berdi.
Sahnada Qazaqstan, Reseı, Belarýs, Izraıl, Tájikstan, Ýkraına jáne RF sýbektileri Bashqurtstan men Tyva Respýblıkalarynan sulýlar baq synasty.
Aıta ketsek, 24 jastaǵy Á.Toqashova halyqaralyq baıqaýǵa birinshi ret qatysyp otyrǵan joq. Osydan bir jyl buryn Fılıppınde ótken «Miss Intercontinental - 2018» sán baıqaýynda baq synaǵan edi. Onyń Ózbekstandaǵy «Miss Union Fashion-2019» IV Halyqaralyq baıqaýynda Qazaqstan namysyn qorǵaıtynyn buǵan deıin jazǵan bolatynbyz.
Foto: www.missintercontinental.de/ áleýmettik jeliler
