Qazaqstandyq boıjetken Býdapeshtte shashtaraz isi boıynsha medalonǵa ıe boldy
Býdapeshttegi sharaǵa 29 eldiń jastar qatysty. Qazaqstan namysyn 25 qatysýshy qorǵady. Olar elimizdiń baıqaýynda jeńimpaz atanǵan bolatyn. Sonymen qatar 23 qazaqstandyq sarapshy qazylar quramynda boldy.
37 mamandyq boıynsha ótken birinshilik túrli salalardy qamtydy. Olardyń qatarynda qurylys, óndiris jáne mashına qurastyrý tehnologııasy, kólik jáne logıstıka, robottyq tehnıka, aspaz isi, florıstıka, ınjenerlik grafıka jáne basqa da kóptegen baǵyttar boldy.
Bizdiń jastar 23 sala boıynsha baq synady. Olar: júk tehnıkasyna qyzmet kórsetý, dánekerleý tehnologııasy, santehnıka jáne jylytý, tońazytqysh jáne jeldetý tehnıkasy, meıramhana servısi, jeńil kólikti jóndeý jáne qyzmet kórsetý, malıar jáne dekoratıv jumystary, florıstıka, mehatronıka, vızýaldyq merchendaızıng jáne vıtrınıstıka, kirpish qalaý, qurylystyń sylaq jumystary, grafıkalyq dızaın, aspaz isi, naýbaıhana sheberligi, elektr montajdaý jumystary, zerthanalyq hımııalyq analız, ınjenerlik grafıka, shashtaraz óneri, kıim dızaıny jáne modeldeý, veb-dızaın.
Osylardyń ishinde Nazıra Ábdýhalılova «Shashtaraz óneri» boıynsha erekshe kózge tústi. Talantty boıjetken «Aıryqsha medalon» ıelendi jáne jınaǵan upaı sany boıynsha 22 eldiń ishinde 4-oryn aldy.
EuroSkills sharasy jyl saıyn WorldSkills Europe qaýymdastyǵyna múshe 29 eldiń birinde uıymdastyrylady. Qazaqstan WorldSkills qaýymdastyǵyna 2014 jyly kirdi, al 2016 jyly EuroSkills qataryna qabyldandy.
Elimizde WorldSkills Kazakhstan bıyl tórtinshi márte ótkizildi. Іs-sharany QR Bilim jáne ǵylym mınıstrligi «Kásipqor» holdıngimen birlesip uıymdastyrdy.
Eske sala ketsek, byltyr qazaqstandyq jas sheberler Ábý-Dabıde ótken álem birinshiligine qatysqan bolatyn.
Aıta keterligi, EuroSkills aıaqtalýyna oraı ótkizilgen saltanatty rásimde baıqaýdyń jalaýy Aýstrııaǵa tabys etildi. Ol memleket kelesi jyly Eýropa birinshiligin uıymdastyrady.
