Qazaqstandyq boksta qaı óńir myqty ekendigi anyqtalýda
ASTANA. 8 qazan. QazAqparat - «Qazaqstan boks federatsııasy kýbogi» respýblıkalyq jarysynda 6 qazan kúni «Batys» jáne «Soltústik» dıvızıondarynyń 1/8 fınaldaǵy tórt oıyny ótip, alǵashqy shırekfınal qatysýshylary anyqtaldy.
Bul týraly «Qazaqstan boks federatsııasynan» habarlady.
Jańaózen qalasynda ótken «Batys» dıvızıonyndaǵy oıyndarǵa HHH jazǵy Olımpıada oıyndarynyń chempıony Serik Sápıev, London olımpıadasynyń kúmis júldegeri Ádilbek Nııazymbetov jáne qola júldegerler - Ivan Dychko men Marına Volnovalar qurmetti qonaq retinde qatysty. Onda Mańǵystaý oblysynyń komandasy aqtóbelikterdi 8:2 esebimen jeńdi. Al Atyraý qalasyndaǵy jarystarda alań ıeleri Batys Qazaqstan oblysynyń boksshylaryn 7:3 esebimen utty.
Qaraǵandyda jalaýyn jelbiretken «Soltústik» dıvızıonynda alań ıeleri qostanaılyqtardy 9:1 esebimen jeńdi. Kókshetaý qalasynda Aqmola oblysynyń bylǵary qolǵap sheberleri Soltústik Qazaqstan oblysynyń komandasyn 8:2 esebimen tize búktirdi.
«Ońtústik» pen «Shyǵys» dıvızıondarynyń oıyndary 13 qazanda bolady.
