Qazaqstandyq boksshynyń qarsylasy ekinshi raýndqa shyqpaı qoıdy
ASTANA. QazAqparat - Qazaqstandyq boksshy Meıirjan Rahymjanov Beıbit Shúmenov pen Hıznı Altynkaı arasyndaǵy aıqastyń anderkartynda kásipqoı boksqa tuńǵysh ret shyǵyp, jeńiske jetti, dep habarlaıdy QazAqparat tilshisi.
Meıirjan qarsylasy Reseıden kelgen Aleksandr Saltykovtan basym tústi. Aleksandar osy ýaqytqa deıin kásipqoı bokstyń sharshy alańynda 62 kezdesý ótkizgen tájirıbeli boksshy edi. Dese de, onyń aıqasynyń kóbi (48-i) jeńilispen aıaqtalǵan.
Qarsylasynyń zor tájirıbesi qazaq boksshysyn taısaltqan joq. Ol al degende-aq ózin sharshy alańda erkin ustap, Saltykovtyń ásirese basyna birneshe jaqsy soqqylardy jiberdi. Jalpy, alǵashqy raýnd Qazaqstan boksshysynyń aıqyn basymdyǵymen ótken edi. Budan keıin bir qyzyǵy, ekinshi raýndqa sharshy alańǵa shyǵýdan reseılik boksshy bas tartty. Osylaısha, Meıirjan kásipqoı bokstaǵy alǵashqy kezdesýin tehnıkalyq nokaýtpen aıaqtap otyr.
Eske sala ketsek, budan buryn Shúmenov - Altynkaı kezdesýiniń alǵashqy anderkartynda qazaq boksshysy ári ánshisi Ibragım Eskendir reseılik qarsylasyn nokaýtqa jibergen bolatyn. Odan keıin taǵy bir qazaq boksshysy Edil Qojamberdıev reseılik Sergeı Beloshapkındi utty.
