Qazaqstandyq boksshylardyń Olımpıada joldamalaryn qalaı alatyny belgili boldy
Komıtettiń habarlaýynsha, HOK Atqarýshy komıtetiniń Lozannada ótken otyrysynda 2020 jylǵy Tokıo oıyndaryna irikteý básekesin ótkizýge qatysty qosymsha usynystar jasalǵany týraly aıtylǵan.
Onda, irikteý týrnırleri 2020 jyldyń qańtary men mamyry aralyǵynda ótetini, jalpy esebi tórt báseke josparlanǵany, onyń bireýi álemdik irikteý básekesi ekeni atap ótilgen.
Іrikteý syndary Olımpıada oıyndaryn ótkizgen nemese tórtjyldyq dodasyn endi qabyldaıtyn qalalarda uıymdastyrylmaq.
«Qurlyqtyq doda 2020 jyldyń 1 qańtary men 20 sáýiri aralyǵynda ótedi. Azııa jáne Okeanııa aımaqtyq irikteý básekesine qazaqstandyq boksshylar da qatyspaqshy. Bul aımaqta erler arasynda 41, áıelder arasynda 22 joldama sarapqa salynady. Erler arasyndaǵy joldamalar tómendegi retpen beriledi: 52, 57 jáne 63 kelige deıingi salmaq dárejesine alty kvota, 69, 75 jáne 81 kelige deıingi salmaq dárejesine bes kvota, 91 jáne asa aýyr salmaqta tórt kvotadan bólingen. Áıelder arasyndaǵy qurlyqtyq týrnırde lıtsenzııa tómendegi ádispen taratylady: 51 kelige deıingi salmaq dárejesinde alty kvota, qalǵan tórt salmaqqa (57, 60, 69, 75 kelige deıingi salmaq dárejesi) tórt kvotadan beriledi» delingen atalǵan aqparatta.
Atalǵan týrnırlerde lıtsenzııaǵa ıelik ete almaǵan boksshylar 2020 jyldyń mamyrynda ótetin álem chempıonatynda synǵa túsip, taǵy bir márte Olımpıadaǵa barý múmkindigine talasa alady.
Sondaı-aq, álemdik dodada erler arasynda 31-35, áıelder arasynda 19-21 kvota sarapqa salynatyny belgili boldy.
Aıta keteıik, Tokıo Olımpıadasyndaǵy boks básekesi 2020 jyldyń 25 shildesi men 9 tamyzy aralyǵynda ótedi.
Esterińizde bolsa, osyǵan deıin bokstan Tokıo Olımpıadasyna irikteý kezeńi qashan bastalatyny jáne osyǵan deıin qazaqstandyq boksshylar Olımpıada oıyndarynan qansha medal jeńip alǵany týraly jazǵan bolatynbyz.
