Qazaqstandyq boksshylardyń IBO-daǵy reıtıngi jarııalandy

NUR-SULTAN. QazAqparat – Halyqaralyq boks uıymynyń (IBO) barlyq salmaq sanaty boıynsha jańartylǵan reıtıngti jarııalandy, dep habarlaıdy QazAqparat tilshisi.

VKontakte áleýmettik jelisindegi «Qazaqstan kásipqoı boksy» akkaýntynyń málimetine súıensek, Ivan Dychko 55-ten 75-shi orynǵa syrǵyp ketken. Bul sanatta IBO Inter-Continental chempıony – Jan Kosobýtskıı. Al birinshi aýyr salmaqtaǵy Álı Baloev 82-den 85-shi pozıtsııaǵa túsken. Edil Qojamberdıev 92-den 94-shi satyda turaqtaǵan.

Ekinshi orta salmaq dıvızıonyndaǵy Aıdos Erbosynuly 29-shy orynnan 20-ǵa kóterilse, Nurzat Sabyrov pen Álı Ahmedov bir-bir orynǵa keıin syrǵyp, 33-shi jáne 34-shi oryndardan kórinip otyr.

Atalmysh reıtıngte Qanat Islam kórsetkishin jaqsartyp, 13-shi orynǵa taban tiredi. Al onyń salmaǵyndaǵy Meıirim Nursultanov 15-shi pozıtsııaǵa (+2) shyqsa, Jánibek Álimhanuly 27-shi oryndy saqtap qaldy. Bul salmaq dárejesinde kósh basynda – otandasymyz Gennadıı Golovkın tur.

Birinshi orta salmaq dıvızıonynda Sadrıddın Ahmedov 28-shi orynnan 27-ge kóterilse, Madııar Áshkeev tizimde 68-shi (+2) bolyp tur.

Jartylaı orta salmaqtaǵy Nursultan Jańabaev 30-shy ornyn saqtap qaldy. Al Danııar Eleýsinov bolsa, 70-ten 38-shi orynǵa bir-aq «sekirgen». Bul sanatta Bobyrjan Momynov – 77-shi.

Birinshi jartylaı orta salmaqtaǵy Batyr Júkembaev úzdik on bes boksshynyń qatarynda qalyp, 11-shi orynǵa jaıǵasqan. Bul sanatta Jańqosh Turarov 46 (+1) orynnan kórindi.

Ótken joly 49-ynshy orynda turǵan jeńil salmaqtaǵy Vıktor Kotochıgov 37-ge turaqtasa, Abylaıhan Qusaıynov 79-shy orynǵa syrǵydy.

Ekinshi ortasha jeńil salmaqta Sultan Zaýyrbek reıtıngte 81-shi bolyp tur. Al Stanıslav Kalıtskıı bul sanatta úzdik 100 boksshynyń qatarynan shyǵyp qaldy.

Jeńil salmaqta Elshat Nyǵmetolla kórsetkishin ońaltyp, 65-shi orynnan 55-ke kóterildi.