Qazaqstandyq boksshylar Vengrııada ótken týrnırde 4 medal jeńip aldy
ASTANA. QazAqparat - Vengrııanyń Debretsen qalasynda jyl saıyn uıymdastyrylatyn Ishtvan Boskaıa memorıaly halyqaralyq týrnıri ótti. Oǵan bokstan Qazaqstan quramasy da qatysty, dep habarlaıdy Qazaqstan boks federatsııasynyń baspasóz qyzmeti.
Týrnırge álemniń 20 memleketinen 160-tan astam boksshylar qatysty.
Qazaqstandyq komandanyń aktıvinde birneshe nagrada bar. Altyn medaldy 75 kelige deıingi salmaq dárejesinde óner kórsetetin Erik Áljanov jeńip aldy. Al, 81 kelige deıingi salmaq dárejesinde ekinshi oryndy Shaımurat Qusaıynov ıelendi. Qola medal 52 kelige deıingi Azat Mahmetov pen 69 kelige deıingi salmaqta judyryqtasatyn Ilıa Ochkınge buıyrdy. Atalǵan boksshylardyń barlyǵy Pavlodarda ótken el chempıonatynan soń Qazaqstannyń jańartylǵan quramasynyń músheleri bolatyn.
Aǵymdaǵy jyly qazaqstandyq boksshylardy eki iri jarys kútip tur. Olar álem jáne Azııa chempıonattary. Myrzaǵalı Aıtjanov bastaǵan bapkerler quramy tańdaýdy tanymal halyqaralyq jarystardyń qorytyndysy boıynsha jasaıdy.
