Qazaqstandyq boksshylar Tashkentte ótetin Azııa chempıonatyna tolyq quramda qatysady
ASTANA. QazAqparat - 2017 jylǵy 30 sáýir - 7 mamyr aralyǵynda Ózbekstan astanasynda eresekter arasynda bokstan Azııa chempıonaty ótedi, dep habarlady Azııa boks konfederatsııasy.
Naýryz sońynda qurylyqtyq irikteý birinshiliginde komandalardy tirkeý aıaqtalady, onda Gambýrgtegi álemdik chempıonatqa lıtsenzııa oınatylady.
«Aldyn ala aqparat boıynsha 29 elden 200-den astam boksshy qatysady dep kútip otyrmyz. Konfederatsııa prezıdenti Serik Qonaqbaev atap ótkendeı, bizge Aýǵanstan, Býtan, Lıvan, Pákistan, Sırııa sııaqty elderdiń qatysqany asa mańyzdy. Kúrdeli jaǵdaıǵa qaramastan bul memleketter bokstyń damýyna múmkindik tabady», - dedi ABK atqarýshy dırektory Baqdáýlet Tórehanov.
13 elden tolyq komanda bar, olar Úndistan, Iran, Iordanııa, Qazaqstan, Qytaı, Qyrǵyzstan, Mońǵolııa, Pákistan, Tájikstan, Fılıppın, Shrı-Danka, Ózbekstan, Ońtústik Koreıa.
«Eger ótken onjyldyqtyń serpinine qarasaq, 2007 jyly azııalyq birinshilikte Mońǵolııada 18 elden 144 boksshy qatysty. 2009 jyly Qytaıda - 18 elden 119 sportshy, 2011 jyly Ońtústik Koreıada 22 memleketten 135 boksshy, 2013 jyly Iordanııada 27 elden 162 qatysýshy, 2015 jyly Taılandta 28 elden 188 atlet qatysty. Bul statıstıka bizdiń óńirde bokstyń ilgerilep damýyn kórsetedi, - dep atap ótti Tórehanov.
Eresekter arasynda bokstyń basty birinshiligi 30 sáýirde «Ózbekstan» sport kesheninde bastalady. Fınaldyq jarystar 2017 jylǵy 7 mamyrda ótedi.
