Qazaqstandyq boksshylar sharshy alańda alǵash ret qorǵanys shleminsiz shaıqasady
ASTANA. 6 qarasha. QazAqparat - Osy aıdyń sońǵy kúnderinde ótetin eresekter arasyndaǵy bokstan Qazaqstan Respýblıkasynyń chempıonatynda boksshylar alǵash ret qorǵanys shleminsiz judyryqtasatyn bolady. Bul týraly búgin elordada uıymdastyrylǵan baspasóz máslıhatynda Qazaqstan boks federatsııasynyń vıtse-prezıdenti Serik Qonaqbaev málim etti.
«Bul sheshimdi Halyqaralyq boks qaýymdastyǵynyń basshylyǵy qabyldaǵan bolatyn. Endi mine araǵa 25 jyl salyp boksshylar qaıtadan shlemsiz sharshy alańda jekpe-jekke shyǵady», - dedi ol.
Onyń atap ótýinshe, AIBA-nyń jańa erejesi kelesi jyldan bastap halyqaralyq týrnırler men ulttyq federatsııalar jarystarynda qoldanysqa engiziledi. Aıta keterligi, mundaı usynysty Qazaqstan boks federatsııasynyń prezıdenti Tımýr Qulybaev jasaǵan bolatyn.
«Egerde biz tehnıkalyq bóligin daıyndap úlgersek, onda aǵymdaǵy jylǵy el chempıonatynda tóreshilerge qatysty jańa jańalyq engiziledi. ıAǵnı, jekpe-jekke qazirgideı 5 tóreshi emes, 3 tóreshi tórelik jasaıdy», - dedi S.Qonaqbaev.
Aıta keteıik, Eresekter arasynda bokstan Qazaqstan chempıonaty qarasha aıynyń 22-29 kúnderi elordadaǵy «Dáýlet» sport kesheninde ótedi. Oǵan elimizdiń barlyq óńirlerinen 180-nen astam bylǵary qolǵap sheberi qatysady. Bul dúbirli dodaǵa London Olımpıadasynyń chempıony Serik Sápıev pen atalǵan olımpıada júldegerleri Ádilbek Nııazymbetov pen Ivan Dychko qatyspaıdy.
