Qazaqstandyq boksshylar Olımpıada joldamasyn Iordanııada sarapqa salady

NUR-SULTAN. QazAqparat - Bokstan Azııa aımaqtyq irikteý týrnıri Iordanııanyń Amman qalasynda ótedi, dep habarlaıdy QazAqparat Olympic.kz silteme jasap.

Halyqaralyq Olımpıada komıtetiniń jumys toby Bokstan 2020 jylǵy Tokıo Olımpıadasyna Azııa/Okeanııa aımaqtyq irikteý týrnıri 3-11 naýryz aralyǵynda Amman qalasynda ótetini resmı túrde habarlady.

«HOK-tyń jumys toby jáne Qytaıdyń Olımpıada komıteti 2020 jyldyń 3-14 aqpany aralyǵynda Qytaıdyń Ýhan qalasynda ótýi tıis týrnırdi atalǵan aımaqta koronavırýstyń taralýyna baılanysty keıinge shegergen bolatyn.

Túrli nusqalardy qarastyrǵan jumys toby irikteý dodasyna qarqyndy daıyndalyp jatqan sportshylarǵa yńǵaıly bolý úshin Iordanııa Ulttyq Olımpıadalyq komıtetiniń ótinimin maquldady», - delingen hatta.

«Jumys toby irikteý týrnırin qysqa merzim ishinde uıymdastyrýǵa kómektesken barshańyzǵa alǵys bildiredi», - delingen resmı habarlamada.