Qazaqstandyq boksshylar «Kanelo» zalynda jattyǵýǵa kiristi

ASTANA. QazAqparat – Qazaqstandyq boksshylar ekinshi orta salmaqtaǵy álemniń absolıýtti chempıony Saýl «Kanelo» Alvarestiń San-Dıego qalasynda ornalasqan zalynda jattyǵýǵa kiristi, dep habarlaıdy QazAqparat.

«Bizdiń «Suleimen Promotions» boksshylary Amerıka Qurama Shtattaryndaǵy Saýl «Kanelo» Alvarestiń zalynda, bilikti bapker Eddı Reınosamen birge alǵashqy jattyǵý jumystaryn bastady», - delingen atalǵan promoýterlik kompanııanyń Instagram-paraqshasynda.

«Kanelo» zalynda jattyǵatyn boksshylarymyz arasynda Ábilhan Amanqul, Evgenıı Pavlov, Bek Nurmaǵambetov pen Danıla Semenov bar.

Aıta keteıik, qazaqstandyqtar álemge áıgili meksıkalyq boksshymen buǵan deıin de birneshe ret birlesken daıyndyq ótkizgen edi. Sonymen qatar rıngke Alvarestiń sparrıng-seriktesi retinde de shyqqan bolatyn.

Buǵan deıin «Suleimen Promotions» kompanııasy Saýl Alvarestiń Qazaqstan boksshylarymen tájirıbe bólisip jatqan sátinen vıdeo jarııalaǵan bolatyn. Sondaı-aq ol barsha qazaqstandyqtarǵa óz atynan sálem joldaǵan edi.