Qazaqstandyq boksshylar halyqaralyq týrnırde 4 altyn medal oljalady
ASTANA. QazAqparat - Germanııanyń Oderdegi Frankfýrt qalasynda ótken jastar arasynda bokstan «Brandenbýrg kýbogy» halyqaralyq týrnırinde Qazaqstan boksshylary 4 altyn men 1 kúmis medal enshiledi, dep habarlady QR Boks federatsııasynan.
Atap aıtqanda, 56 kelide el namysyn qorǵaǵan Sultan Zaýyrbek chempıon atandy. 60 keli salmaq sanatynda sharshy alańǵa kóterilgen Abylaıhan Júsipovke de teń keler eshkim bolmady. Sondaı-aq 64 kelide Aıan Qalıbekovtiń, 81 kelide Vadım Kazakovtyń mereıi ústem boldy. Al 91 keliden joǵary salmaq sanatynda judyryqtasqan Eldos Qadyrbaev fınaldyq kezdesýde Ulybrıtanııa boksshysyna ese jiberdi.
Aıta keteıik, atalǵan baıraqty básekede Qazaqstan boksshylary 10 salmaq sanatynyń altaýynda óner kórsetken bolatyn. Týrnırge álemniń 20 elinen 140 bylǵary qolǵap sheberi qatysty.
