Qazaqstandyq boksshylar Germanııadaǵy álem chempıonatynda kóshbasshylardyń qatarynda
ASTANA. QAZAQPARAT - Gambýrgte ótip jatqan Bokstan eresekter arasyndaǵy álem chempıonatynyń 1/2 fınalyna 6 qazaqstandyq boksshy shyǵyp, jalpy esepte Ózbekstanmen birge ekinshi orynǵa turaqtady, dep habarlaıdy AIBA.
Birinshi orynda - 7 boksshymen Kýba quramasy tur.
Medaldardyń qalaı bóliske salynatyny 31 tamyz ben 2 qyrkúıek aralyǵynda ótetin jartylaı fınal jáne fınaldyq aıqastarynda anyqtalady.
«Qazaqstan búkilálemdik boks reıtıngindegi óziniń kóshbasshy ekenin taǵy bir ret dáleldedi, bul óte jaqsy kórsetkish. Jalpy, jartylaı fınalǵa joldama alǵandar boıynsha Azııanyń birinshi oryndy ıelengeni, shyn máninde, tarıhı oqıǵa. 40 medaldiń 15-i osy qurlyq ókilderine buıyratyny belgili. Ekinshi oryndaǵy Amerıka konfederatsııasynan 1/2 fınalǵa 12 boksshy shyqty. Al úshinshi orynda 11 sportshymen Eýropa qurlyǵy tur. Bir-bireýden boksshysy bar Afrıka men Okeanııa aımaqtary 4-oryndy bólisip tur», - dedi AIBA vıtse-prezıdenti Serik Qonaqbaev.
Germanııada ótip jatqan álem chempıonaty 25 tamyzda bastalǵan, aqtyq básekeler ústimizdegi jyldyń 2 qyrkúıeginde ótedi.
Azııanyń namysyn jartylaı fınalda alty boksshysy shyqqan Qazaqstan men Ózbekstan, sondaı-aq bir-bir ókilmen júrgen Úndistan, Ońtústik Koreıa jáne Mońǵolııa elderi qorǵaıdy.
Azııa boks konfederatsııasy - Halyqaralyq áýesqoı boks assotsıatsııasynyń (AIBA) 5 qurlyqtyq qurylymdyq bólimderiniń biri. 2014 jyldyń qyrkúıeginen bastap osy konfederatsııany dańqty qazaqstandyq boksshy Serik Qonaqbaev basqaryp keledi.
Foto: Danııar Maılybaev
