Qazaqstandyq boksshylar Baký týrnırinde 3 altyn, 2 kúmis jeńip aldy
ASTANA. 14 naýryz. QazAqparat - 9-13 naýryz aralyǵynda Bakýde ótken bokstan «Uly Jibek joly-2011» halyqaralyq týrnırinde qazaqstandyq boksshylar 3 altyn jáne 2 kúmis medaldi oljalady.
10 salmaq dárejesi boıynsha ótken dodanyń aqtyq kezeńine Qazaqstan quramasynan 5 boksshy óte aldy. Alǵashqy joǵary dárejeli júldeni 56 kg salmaqta óner kórsetetin Mádı Sholaqov qorjynymyzǵa salǵan bolatyn. Fınaldyq kezdesýde ol Ragım Nadjafovtan aılasyn asyrdy. Bul synnan keıin sharshy alańǵa Ǵanı Jaılaýov pen grýzııalyq Nıke Izorııa shyqty. Jekpe-jek jerlesimiz Ǵ. Jaılaýovtyń jeńisimen aıaqtaldy.
Al 64 kg salmaq dárejesinde bokstasatyn taǵy bir qazaqstandyq Almasbek Álibekov jergilikti boksshy Anar Jafarovtan utyldy, sóıtip kúmis júldeni qanaǵat tutty. Úshinshi altyn medaldy Baqytjan Qojabekov enshiledi. Ol óziniń qarsylasy taǵy bir ázirbaıjandyq Emil Ahmedovty jeńdi. 75 kg deıingi salmaqta Danabek Sýjanov reseılik Dmıtrıı Bıvoldan basym túse almady. Onyń enshisine kúmis medal buıyrdy. Osylaısha, Myrzaǵalı Aıtjanovtyń tálimgerleriniń qanjyǵasy 3 altyn jáne 2 kúmis júldemen maılandy.. Reseı men Ázirbaıjan boksshylarynyń qorynda da 3 altynnan bar. 49 kg. salmaq dárejesinde bir altyndy Túrkııa boksshysy Farhad Pehlevan jeńip aldy.
